Brasil vota este domingo baixo a sombra das inxerencias dos Estados Unidos

A Avogacía Xeral do Brasil pide investigar o suposto financiamento capital estranxeiro na campaña electoral. 

O presidente do Brasil e candidato do PT, Luiz Inácio Lula da Silva e o candidato do PL, Flávio Bolsonaro

Escrito por Ricardo Suárez 

As autoridades do Brasil instaron a Policía Federal e a Fiscalía Xeral a investigar o suposto financiamento por parte dos Estados Unidos destinado a interferir nas eleccións brasileiras e deslexitimar o Supremo Tribunal Federal. 

Así o fixeron no marco da primeira volta das eleccións presidenciais deste domingo, nas que o actual mandatario, Luiz Inácio Lula da Silva, do Partido dos Trabalhadores, e o ultradereitista Flávio Bolsonaro, do Partido Liberal, parten moi igualados.

A Avogacía Xeral de Unión, órgano que representa legalmente o Executivo brasileiro, anunciou a solicitude de investigación ante a información "especialmente grave" publicada polo diario británico The Guardian, segundo a cal o Goberno dos EUA pretende desviar fondos de Dereitos Humanos do Departamento de Estado a iniciativas en diversos países, entre as cales se atoparía unha campaña contra o Supremo Tribunal Federal do Brasil.

"De comprobarse, a recepción de capital estranxeiro para promover ataques organizados e sistemáticos contra a soberanía nacional e o funcionamento das institucións do Sistema de Xustiza brasileiro, mediante a instrumentalización de fondos internacionais desviados do seu propósito orixinal de protexer os dereitos humanos, podería revelar unha estrutura de inxerencia externa nos asuntos internos do Estado brasileiro", manifestou a Avogacía Xeral de Unión a través dun comunicado.

"A propia orde constitucional brasileira baséase nos principios de soberanía, independencia e non intervención. Tales premisas tradúcense, por exemplo, na prohibición do financiamento ou subordinación de agrupacións políticas por parte de entidades ou Gobernos estranxeiros", acrecentou.

A este respecto, o avogado xeral do Estado brasileiro, Jorge Messias, afirmou que "non se pode admitir que intereses estranxeiros pretendan interferir". Pouco despois, as autoridades dos Estados Unidos anunciaron a suspensión dos servizos consulares na súa embaixada e nos seus consulados no Brasil alegando "motivos de seguridade" que non foron especificados.

[Fotos: Leandro Chemalle - fonte: www.nosdiario.gal]