Cuba: Trump afortís lo blocatge petrolièr e cabussa l’illa dins l’incertitud

Lo durciment del blocatge petrolièr decidit per Washington paralisa los transpòrts, fragiliza los espitals e accentua l’inflacion, mentre que los cubans oscillan entre colèra, lassièra e crenhença d’un avenidor totjorn que mai malsegur

A L’Avana, lo quotidian es paralisat dempuèi lo refortiment del blocatge petrolièr decretat per Donald Trump, çò rapòrta L’Humanité. La decision de Washington d’interrompre lo provesiment en carburant a agravat una crisi ja prigonda. Espitals e clinicas reduson lors servicis, l’universitat fonciona a distància e los transpòrts publics son largament paralisats. La gasolina, d’ara enlà venduda en dòlars, es venguda inaccessibla, mentre que l’inflacion encarís cada jorn mai los produches de basa.  

Per las carrièras, las bordilhas s’amolonan e las laissas dels comercis demòran voidas. Pasmens, per pro d’abitants, la novetat es pas la penúria mas l’angoissa de l’endeman. «Çò que m’inquièta es çò que poiriá arribar deman, e aquò degun o pòt pas predire», çò ditz Aluan Pons, taxista, mentre que lo torisme, ressorsa vitala, s’afondra de mai en mai. En 2025, la frequentacion toristica representava mens de la mitat de la de 2018.   

Lo 5 de febrièr, las autoritats anoncièron un plan d’estalvis d’energia e accelerèron lo desvolopament del solar, sens capitar a enraiar l’espirala. A Washington, lo secretari d’estat Marco Rubio evòca un «cambiament de regim», mentre que lo president cuban Miguel Díaz-Canel afirma demorar dobèrt al dialòg, dins lo respècte de la sobeiranetat nacionala.   

Malgrat l’aganiment, fòrça afichan una desfisança intacta fàcia als Estats Units. «La revolucion se va pas afondrar. Avèm conegut pièger», çò assegura Carlos Villarrutia, un abitant de L’Avana. Entre colèra, lassièra e glòria de sa revolucion, l’illa se demanda quant de temps aquò pòt durar.

[Imatge: Vilaweb - sorsa: www.jornalet.com]