L’integracion de colons armats dins l’estructura militara israeliana borrola la frontièra entre armada e milícias, afortís l’impunitat e accelèra los desplaçaments forçats de comunautats palestinianas en Cisjordania ocupada
Las unitats dichas «hagmar» («la fin» en ebrieu), compausadas exclusivament de colons israelians e integradas coma fòrças de «defensa regionala», son al còr de vivas criticas pertocant lor ròtle dins la Cisjordania ocupada, çò rapòrta El Diario que mençona The Guardian. Creadas a granda escala après lo 7 d’octòbre de 2023 per tal de suplir los soldats regulars desplegats dins la lista de Gaza, aquelas unitats de volontaris an recebut armas, autoritat e salaris de l’estat israelian. Segon de testimoniatges de reservistas e d’ONG, opèran pasmens amb un contraròtle limitat e una larga autonomia sul terren.
Segon de donadas de las Nacions Unidas, l’aument de las violéncias de colons dempuèi octòbre de 2023 a entraïnat lo desplaçament forçat de 29 comunautats palestinianas, siá en mejana mai d’una per mes, contra quatre pendent tot l’an 2022 e los primièrs nòus meses de 2023. De soldats israelians que serviguèron en 2024 e 2025 los descrivon coma de «milícias armadas» qu’agisson de còps abans l’arribada de l’armada regulara, e, dins cèrts cases, participan a las atacas contra de civils palestinians. «Fan çò que vòlon», çò declara a prepaus dels hagmar Yaakov (nom fictiu), que serviguèt dins l’armada regulara en Cisjordania en 2024. «Formalament, son jols òrdres del comandant del batalhon e de son adjonch, mas sul terren benefícian d’una totala libertat. Lo naut comandament cluca los uèlhs quand i a d’incidents, rendon pas compte a cap d’oficièr», çò denóncia Yaakov.
Los faches raportats van d’actes de vandalisme, de panatòris de bestiar e d’intimidacions a de violéncias mai grèvas, dont d’omicidis. Breaking the Silence (Rompre lo Silenci), l’ONG qu’intègra d’ancians combatents de l’armada israeliana, afirma que lo sistèma dels hagmar a, de fach, integrat de «colons-soldats» al quite sen de las fòrças armadas, borrolant la frontièra entre violéncia estatala e violéncia de colons. Las Nacions Unidas estiman que la creacion d’aquelas unitats a assolidat l’impunitat dels autors d’exaccions.
L’armada israeliana reconeis «d’incidents» contraris a las règlas, en assegurant que representan pas la majoritat dels volontaris e que d’enquistas son estadas dobèrtas. Mas segon d’organizacions de defensa dels dreches umans, las perseguidas demòran fòrça raras. Sul terren, la confusion entre civils armats e soldats en unifòrme, aital coma la multiplicacion de las armas distribuidas dempuèi lo començament de la guèrra, complican l’identificacion de las responsabilitats e afortisson un clima de tension e d’inseguretat duradissa.
[Imatge: Zain Jaafar/AFP - sorsa: www.jornalet.com]
Sem comentários:
Enviar um comentário