Os cumes borrascosos trasládanse a Galicia

A escritora viguesa Cati Calo fusiona o gótico victoriano con lendas rurais no seu bautismo coa editorial Versátil. Mestura misterio, recordos familiares e historia en «A señora de Pedramorta»

Cati Calo, escritora viguesa, na librería Vigo de Papel

Escrito por Begoña R. Sotelino  

Cati Calo (Vigo, 1990) acaba de publicar A Señora de Pedramorta, unha novela gótica ambientada en Galicia (Versátil Edicións) que está a espertar un entusiasmo inesperado: a primeira edición esgotouse á semana de saír e xa está en marcha a segunda. A combinación de atmosfera gótica en Galicia e unha protagonista incómoda pero magnética colocou o seu debut no radar de lectores que buscan historias diferentes, lendas de aquí, con raíces locais e un pulso literario propio. Tan de aquí é que ata recolle o nacemento deste xornal, en xaneiro de 1882: «A trama transcorre no mesmo ano en que se fundou La Voz de Galicia e nun diálogo, os personaxes mencionan o nacemento do novo diario», conta.   

Calo escribe desde moi pequena. Antes de que existisen as plataformas dixitais ou a posibilidade de publicar, ela xa imaxinaba mundos en cadernos que logo destruía por pudor. «Inventaba historias para xogar e logo rompíao todo», lembra. En plena adolescencia, a lectura dO Señor dos Aneis foi a faísca que acendeu algo máis persistente: relatos de fantasía que por primeira vez non quería esquecer. Aínda así, o seu salto para compartir publicamente a súa escritura chegou máis tarde, case por casualidade. Buscando opcións na internet para publicar sen custo, topouse con Wattpad, a plataforma que acabaría marcando os seus inicios. Alí subiu unha triloxía de fantasía «sen ningunha expectativa», asegura. 

Pero a resposta foi fulminante: máis de 20.000 lecturas e unha comunidade de seguidores atoparon na súa historia unha voz diferente. Aínda que agora ten a súa conta pouco activa e recoñece que a triloxía necesita unha reescritura, non renega daquela etapa: «Foi onde aprendín a ser constante, a escribir sabendo que alguén me lía alén», di. Antes de intentalo cunha editorial, probou a autopublicación en Amazon cunha novela curta. Investiu no seu propio produto para experimentar e mellorar o proceso completo. «Paguei eu unha correctora profesional coa que traballo ás veces para que me revise os textos e ao maquetador e ao ilustrador», conta. 

Esa experiencia profesionalizada foi o paso previo a escribir A Señora de Pedramorta, un manuscrito que enviou a varias editoriais ata que Versátil a fichou. A autora compaxina a escritura cunha vida académica en plena transformación. Sanitaria de formación, está en excedencia para estudar un ciclo de desenvolvemento de aplicacións. «Son multitasking», chancea. «Interésanme demasiadas cousas». E esa curiosidade dispersa e fértil cóase tamén nos seus libros, onde conviven a historia, mitoloxía galega e as referencias literarias que marcaron a súa vida. «Son fan absoluta de Jane Eyre, Cumes Borrascosos, Outra volta de porca, Frankenstein.... E tamén dOs pazos de Ulloa. Quería facer algo gótico victoriano, pero con alma galega», explica. 

Tras anos escribindo unha triloxía, necesitaba liberdade. «Estaba queimada da mesma historia», confesa. Por iso buscou unha protagonista distinta, imperfecta, un pouco antipática ao principio. Tamén quixo integrar recordos familiares: historias que lle contaba a súa avoa sobre antepasados, ningunhas demasiado reveladoras como para detallalas sen estragar o final do libro e aínda que provén dunha familia de mariñeiros de Bouzas, neste caso non está relacionado co mar: «están relacionados coa nai da miña tataravoa. Ou sexa, historias familiares que pasaban no rural», acouta. A ambientación combina precisión histórica, documentada con visitas a museos, consultas a historiadores e escritos de época, con liberdade creativa. «Vigo, Pontevedra ou Santiago aparecen no libro, pero os pobos son inventados. Así teño marxe para crear as miñas lendas sen que ninguén me diga que na súa aldea non era así», argumenta. 

A pesar de que os seus lectores xa lle piden unha secuela ou incluso unha precuela, Calo considera que A Señora de Pedramorta é autoconclusiva. A súa atención está agora noutros proxectos: unha novela xuvenil que quere presentar ao premio NEO e unha historia gótica con dúas liñas temporais (1918 e 1809) situada nun mosteiro, de novo con lendas galegas e un toque sobrenatural. Entre exames, firmas e a promoción da súa obra, Cati móvese con cautela e determinación. «Escribo o que me gustaría ler», resume. E parece que moitos lectores compartían ese desexo: unha historia gótica feita en Galicia, con raíces e un imaxinario propio que se abre camiño.  

Wattpad, fenómeno da creación e o consumo literario   

Wattpad, a plataforma onde Cati Calo comezou a compartir a súa triloxía, converteuse nun fenómeno global que redefine como se descobren e consomen novas voces literarias. Con millóns de usuarios e unha comunidade especialmente activa en todo o mundo e moito en América Latina, funciona como unha rede social na que escritores publican capítulos, reciben comentarios inmediatos e poden acadar cifras de lectura impensables noutros espazos. O impacto é tal que a plataforma conta co seu propio selo editorial e acordos con produtoras: varios libros nados alí serán adaptados por Netflix.

[Fonte: www.lavozdegalicia.es]