A Mesa pola Normalización Lingüística convoca unha concentración o venres 4 de abril ás 9h30, diante do xulgado de Padrón, en defensa do dereito a vivir en galego e en solidariedade con Marcos Maceira e Sara Seco, acusados dun suposto delito de inxurias por denunciar diante dos medios e nas redes sociais un atestado no que a policía municipal de Rianxo afirmaba que os traballadores públicos “non tiñan obriga de falar en galego”.
O presidente da Mesa, Marcos Maceira, e a tiktoker Sara Seco declararán como investigados, por defender o dereito dun cidadán de Rianxo a ser atendido na nosa lingua. Maceira e Seco denunciaron perante os medios de comunicación e nas redes sociais un atestado no que a policía municipal de Rianxo, perante a solicitude de atención en galego dun cidadán, afirmaba que “en Galicia o castelán é unha lingua igualmente oficial” e que “non tiñan obriga de falarlle en galego”, polo que foi advertido “moi seriamente, de que depuxese esa actitude”. Acto seguido, a policía propuxo o cidadán para sanción por alterar gravemente a orde no centro de saúde, infracción administrativa da que foi absolto.
Para a Mesa, a denuncia policial é “un ataque á liberdade de expresión e de opinión” e “un paso máis no intento dos responsábeis policiais de Rianxo de intimidar e amedrentar a quen ouse pór en evidencia as actitudes hostís á lingua galega”. Actitudes que pretenden preservar, segundo denuncia a entidade de defensa da lingua, “con absoluta impunidade”.
“Esa actitude ficou clara no proceso xudicial contra o cidadán que reclamou o seu dereito á atención en galego”, afirman, “e agora denunciando destacados membros da Mesa por reproduciren a literalidade dun atestado policial e dunha resolución sancionadora da Subdelegación do Goberno na Coruña”.
Neste sentido, A Mesa reafirmou a súa vontade de continuar a defender a calquera persoas que vexa vulnerado o seu dereito a empregar o galego sempre e en todo lugar.
[Fonte: www.amesa.gal]
Sem comentários:
Enviar um comentário