Tornimos de muevo a los diskos

 

Prezentado por Silvyo OVADYA

Kuando era chiko, en los anyos (1959-1965) en kaza teniyamos en el salon una radio Philips ande karishtreando se puediya oyer syertos postos komo Radio Montecarlo o syertos kanales italianos ande podiamos oyer la kompetision de kantikas San Remo. La radio se topava en una parte del moble. I en la otra partida teniyamos un pikap, si me akodro era un Philips ande podiamos sintir diskos de 33 tures, diskos chikos de 45 tures, mizmo diskos antiguos ke se yama mizmo oy en diya en turko “taş plak-diskos de piedra!” de 78 tures. Ya me akodro del pikap ke teniya mi granpapa en Paris ande le plaziya oyer diskos de muzika turka-alaturka- todos diskos de 78 tures.

Antes del anyo 1969; mi madre i mi padre kuande se fueron a viyajar a Paris mos merkaron un instrumento ande era posivle de meter kasetas. Esto fue una revolusion para la muzika. I por las arabas. En kada araba aviya un instrumento para kasetas. I para los ladrones fue una maraviya. En Estambol syenes i syenes de instrumentos fueron rovados; i era mizmo posivle de merkar el instrumento ke te rovaron. Dospues deskuvrieron instrumentos ke se puedian ser transportados a kaza. Si te olvidavas en la araba “guay di mi”. En las kasetas era posivle de enrejistrar kantikas o bozes. I en Şişli, en la suvida ande se topavan los dolmushes para Beşiktaş aviya Pepo ke aparejava kasetas kon las muzikas ke deseavamos. El era el maestro de este echo.

Sony en el anyo 1982 por la primera vez aparejo un album de muzika en CD. I es 8 anyos dospues en 1990 ke el primer album fue publikado en CD en Turkiya. No aviya mas problemes para alimpyar el disko. Disko se puede trasar. Kuando se trasava sintiendo la kantika teniyamos de sintir kozas ke no mos plaziya. I kreo ke los 30-33 anyos dalkavos merki syenes de CDs kon grande plazer. Kuando me iva a Paris me iva al magazen de diskos en los Kampos Eliseos (Champs Elysées), Virgin ke era una maraviya. I aya podiash sintir todos los CDs muevos, mizmo antiguos. I era un plazer de merkar unos kuantos CDs dospues de sintir dyes o vente deyos.

Kuando era ofisier en Kıbrıs en los anyos 1981-82, komo lavorava aya teniya el derecho de merkar syertas kozas. I merki de aya un instrumento de muzika Sony ke tyene una radio, un instrumento para kasetas, i ensima un pikap. Lo empleyi muncho tyempo i esta dainda en kaza.

Dospues kreo ke los 15 o vente anyos dalkavo empesimos a ver los diskos de mi chikes. Dizen ke ay una boz mas mijor de los CDs. No se si es reelmente djusto o no, no lo se.

Deke vos konti esto todo. Esta fin de semana en Feriköy, en el bazar de la munisipalidad organisaron un bazar de diskos ande la djente mostro un grande intereso. I merki unos kuantos diskos muevos i uzados. Ke no vos pareska ke estan baratos. En Turkiya reelmente los CDs fueron muy baratos. I los CDs fueron i son mi primer preferensia.

 

[Orijin: www.salom.com.tr]