Placas bilinguas a Hogaron e Bèthhag

Meslèu que d’inventar toponims eras comissions municipalas qu’an tengut a preservar e transméter era microtoponimia locala

                              Bèthhag

Escrich per Joan-Pau Ferré

Eras comunas de Hogaron (de son nom francizat Fougaron) e de Bèthhag (prononciat [bɛ’tʃatʃ], oficialament Betchat), arrespectivament situadas en Comenge (País d’Aspèth e Salias) e en Coserans, que venguen de botar en plaça placas bilinguas enà ensenhar eths camins publics. Era associacion Eth Ostau Comengés qu’acompanhèc aqueris projèctes.

Despuish eth 21 de heurèr de 2022, data de promulgacion dera lei arrelativa ara descentralizacion, era desconcentracion e era simplificacion (dita “lei 3DS”), eras comunas de mens de 2000 abitants (que n’èran entrò aquiu dispensadas) que deven d’aqueste pè nà ençà nommar e numerotar eths camins comunaus e alimentar ua basa nacionala d’adreças estandardizadas qu’a vocacion de vénguer ua arreferéncia unica nà localizar eths lòcs. Era realizacion d’aqueth adreçatge que deu atau perméter aths factors, aths liuraires deras comandas passadas per internet e aths servicis de secors de ganhar un temps preciós pr’amor eras adreças precedentas que s’arresumavan soen a un nom de lòcdit pas tostemps conegut peths GPS.

Meslèu que d’inventar toponims o de balhar aras carrèras eth nom d’un personatge illustre, eras comissions municipalas de Hogaron e Bèthhag qu’an tengut a preservar e transméter era microtoponimia locala, en concertacion damb era associacion Eth Ostau Comengés, autora d’arrecèrcas istoricas e d’enquèstas au près deras gents enà cuélher aqueth patrimòni culturau immateriau.

Eths elijuts de Hogaron e de Bèthhag qu’an tanben volut qu’eth nom occitan auge era madeisha talha qu’eth nom “oficiau” francizat. En tèrmes de visibilitat e de prestigi culturau, qu’èra indispensable qu’eras duas lengas arrecebessen eth madeish tractament (madeisha polissa e madeisha talha).

Era comuna de Hogaron qu’a tanben profitat dera ajuda deth Conselh Departamentau de Nauta Garona nà doblar eths panèus d’entrada d’aglomeracion. Que i aurà atau quate panèus EB10 pera D13: dus que portaràn era inscripcion “Hogaron” e dus autis eth nom “Eths Carboèrs”, ath nivèu d’aqueth lòcdit.

 

[Sorsa: www.jornalet.com]