Presentan o primeiro dicionario bilingüe 'en liña' galego-italiano

 

Este dicionario é un proxecto pioneiro dentro da lexicografía contrastiva, que foi dirixido pola catedrática emérita da USC, Isabel González, e "facilita a difusión do galego máis aló das súas fronteiras".

                             Reunión no Centro Ramón Piñeiro

O secretario xeral de Política Lingüística, Valentín García, participou este luns na presentación do primeiro dicionario bilingüe 'en liña' galego-italiano, impulsado desde o Centro Ramón Piñeiro para a Investigación en Humanidades, dependente da Consellería de Cultura, Educación, FP e Universidades.

Este dicionario é un proxecto pioneiro dentro da lexicografía contrastiva, que foi dirixido pola catedrática emérita da USC, Isabel González, e "facilita a difusión do galego máis aló das súas fronteiras", como destacou o secretario xeral.

No acto de presentación participaron tamén, ademais de Valentín García e Isabel González, o secretario do Centro Ramón Piñeiro, Armando Requeixo; e o coordinador científico da institución, Manuel González.

Esta ferramenta, bautizada como GALITA, é o segundo volume do dicionario italiano-galego elaborado en formato papel polo Centro Ramón Piñeiro no ano 2000, con preto de 15.000 palabras, e que agora pode descargarse desde a web da institución en formato pdf.

Este segundo volume conta con 20.000 entradas e está dispoñible 'en liña' para buscar unha maior divulgación e mellorar as procuras, proporcionando unha ferramenta adecuada para un público o máis amplo posible.

Os dous dicionarios forman parte do programa de investigación IGALEZ, dirixido e coordinado por Isabel González, e que abarca outros proxectos de orientación lexicográfica, como vocabularios de linguas de especialidade, que pon en contacto o galego e o italiano en sectores concretos, como o turismo ou as belas artes.

Ademais, IGALEX realiza tarefas de asesoramento lingüístico para institucións e empresas do ámbito galego, e contribúe á formación de estudantes de grao e máster, desde a perspectiva da lingüística e a lexicografía italogallegas.

A presentación deste proxecto enmárcase na celebración do Día Europeo das Linguas, que se conmemora cada 26 de setembro desde 2001. Neste contexto, a Xunta organizou para este martes un recitado multilingüe que terá lugar ás 20,00 horas nos soportais do Museo das Peregrinacións, onde un grupo de estudantes do IES Arcebispo Xelmírez I lerán poemas en distintos idiomas europeos e traduciranos ao galego.

[Imaxe:  DAVID CABEZÓN @ XUNTA DE GALICIA - fonte: www.galiciaconfidencial.com]