Lo conjugador verbal del CPLO es ara tanben en lemosin

Après aver cobèrt lo lengadocian, lo gascon e lo provençal, lo conjugador alarga son ofèrta en inclusent aquela quatrena varietat de l’occitan

 

Lo Congrès Permanent de la Lenga Occitana (CPLO) ven d’aviar la version  lemosina de son conjugador verbal occitan, que prepausa près de 9000 vèrbs lemosins classats en 157 modèls.

Après aver cobèrt lo lengadocian, lo gascon e lo provençal, lo conjugador alarga son ofèrta en inclusent aquela quatrena varietat de l’occitan. Lo projècte es estat supervisat per J. L. Lévêque e realizat en associacion amb Novelum-IEO Peiregòrd. Florence Marcouyre, lexicografa del CPLO, a consagrat dos ans a aquel trabalh, amb l’ajuda de Danís Chapduelh.

Per accedir a las conjugasons, los utilizaires pòdon recercar de vèrbs per lor infinitiu sul sit web del Dicodòc o per mejan de l’aplicacion mobila Vèrbòc, disponibla per Android e iPhone. De notar que l’aplicacion es tanplan estada actualizada, ofrissent una interfàcia modèrna e conviviala, aital coma la possibilitat de descobrir la conjugason d’un vèrb a l’azard.

Pels que cercaràn cossí conjugar los vèrbs en aranés, an un conjugador sul sit diccionariaranes.com.

 

[Sorsa: www.jornalet.com]