La fin del plastic per embalar frucha e legums dins l’estat francés

 

L’interdiccion d’utilizar d’embalatges de celofana per plegar la frucha e los legums es oficialament programada en França per la debuta de 2022, levat per qualques excepcions

La frucha e los legums seràn pas pus venduts dins d’embalatges de celofana a partir del 1r de genièr de 2022, en seguida d’un decret signat l’11 de novembre. Aquò concernís las pomas, peras e bananas, los iranges, las clementinas e mandarinas, los kiwis, citrons e pompelmosses, las prunas, los melons e ananasses, las mangas, los fruches de la passion e los caquis per la frucha, e los pòrres, las cogordetas e merinjanas, los pebrons e cogombres, las patanas, pastenagas, tomatas, cebas e rabas, los caulets, las cogordas, los rafes, tartifles e legums raiç pels legums. En cas que la lei siá pas respectada, d’emendas son previstas fins a 15 000 èuros e 1500 èuros de pagament obligatòri per jorn, çò rapòrta Sud Ouest.

Totun, se preveirà una demòra mai longa pels produches mai fragils e venduts en paquets de 1,5 kg. Per çò qu’es de las fragostas e majofas e dels avajons, poiràn contunhar d’èsser embalats dins de saquets de plastic fins al 30 de junh de 2026. Fins al 30 de junh de 2023 pels persècs e cotelets, e fins al 31 de decembre de 2024 per las ensaladas e cerièras.

[Imatge: Jean Beaufort - poblejat dins www.jornalet.com]