«Provocación», de Stanislaw Lem

Cunha nova tradución, o libro é unha gozosa invitación a coñecer o carácter heterodoxo da súa literatura

H. J. P.

O nunca ben ponderado legado do editor galego Francisco Porrúa —moi eloxiado por publicar Cen anos de soidade, de Gabriel García Márquez— segue vivísimo na persoa inqueda de Enrique Redel, aínda que este non sexa plenamente consciente. 

E é que o fundador de Impedimenta é hoxe o imprescindible valedor da obra de Stanislaw Lem (outro galego, pero da Galitzia polaca), a quen outrora trouxo ao español Porrúa no seu selo Minotauro, si, aquel que abriu en 1955 en Bos Aires o emprendedor emigrante de Corcubión. Redel ocupouse de Lem (Lvov, 1921-Cracovia, 2006) xa desde os seus tempos na editora Funambulista, onde precisamente publicou este título fundamental na produción do xenio da ciencia ficción máis sutil que se escribiu no século XX.  

Provocación chega agora ao catálogo de Impedimenta —que xa é o dos lectores de Lem— cunha tradución nova e como unha gozosa invitación a coñecer o carácter heterodoxo dunha literatura que excede a pura fantasía para indagar no Holocausto. 

Mañá estará dispoñible na librerías.

[Fonte: www.lavozdegalicia.es]