Estat espanhòl : Lo franquisme es mai aqui

Catalunya lliure !

Un Tribunal als òrdres del govern espanhòl vèn de condemnar 9 capdaus politics independentistas catalans a de penas de preson pesugassas de 9 a 13 ans segon los cas.

Quin es lo crim d’aquestes independentistas catalans ? Lo d’aver ganhat en 2017 las eleccions al Parlement de Catalonha e d’aver aplicat lo programa pel quin foguèron elegits, valent a dire l’auto-determinacion de Catalonha.

Mai de 40 ans apuèi la despartida del Franco, l’ombra del dictator plana sus la vida politica de l’Estat espanhòl qu’es pas jamai estat vertadierament desfranquisat. Aquò l’empacha d’èsser un Estat plenament democratic segon los critèris de l’Union Europenca.

Pel govern espanhòl quina que sia sa color l’independentisme es pas un corrent legitim, es un delicte.

Lo Partit de la Nacion Occitana exprimís tot a sa simpatia pels 9 capdaus politics independentistas catalans injustament castigats emai a l’ensems del pòble  catalan e tòrna afortir lo seu sosten a l’independentisme catalan.

La solucion passarà per la liberacion sens condicions dels presonièrs politics, cal que los exiliats pòscan tornar lo tot acompanhat d’una amnistia generala, prealables a de negociacions politicas.

L’Union Europenca e mai particularament d’unes Estats influènts coma França (que compta en çò seu una minoritat catalana) e Alemanha podrián servir de mediators en plaça de considerar que se tracha d’un afar intern a l’Estat espanhòl que se’n vòlon pas ocupar.

Es lo ròtle de las instàncias internacionalas e particularament l’ONU d’intervenir al prèp del govern espanhòl per que la crisi catalana se resòlgue d’un biais pacific per la negociacion.

Partit de la Nacion Occitana, 14/10/2019

[Poblejat dins lo.lugarn-pno.over-blog.org]