Lo president de l’Eqüator canta en catalan per protegir Amazonia

O a fach après la signatura d’un acòrdi amb los presidents de Bolívia, Colómbia e Peró qu’establís un plan d’accions per protegir la selva amazoniana

Los presidents de Bolívia, Colómbia, l’Eqüator e Peró an signat un pache a Leticia (Colómbia) per protegir Amazonia. “Es un dever moral de la societat d’ensajar de preservar nòstra planeta, fasèm istòria amb la signatura d’aqueste pache”, çò a dich lo president colombian, Iván Duque. L’acòrdi establís un plan d’accions per protegir la region amazoniana.

Dins l’encastre de l’amassada, lo president eqüatorian Lenín Moreno a cantat la cançon catalana Pare (Paire), de Joan Manuel Serrat. O a fach per demandar que se quite d’agir coma de victimas e que s’assumisca de responsabilitats davant la devastacion de la forèst amazoniana, primordiala per la santat de la planeta.

[Poblejat dins www.jornalet.com]