Es defuntat João Gilberto, paire de la bossa nova

Amb Antônio Carlos Jobim e Vinicius de Moraes, es considerat coma un dels paires d'aquel estil musical que fa una fusion de la samba e del jazz

 

Es mòrt a 88 ans João Gilberto. Amb Antônio Carlos Jobim e Vinicius de Moraes, es considerat coma un dels paires d'aquel estil musical que fa una fusion de la samba e del jazz e qu’es admirat pertot dins lo Mond.

Nascut a Juazeiro, dins lo nòrd-èst de Brasil, Gilberto comencèt de cantar en public a 18 ans pauc abans de se gandir a Rio de Janeiro. Introduguèt la bossa nova en 1959 amb son album Chega de saudade. Puèi publiquèt fòrça autres albums. De soslinhar l’album Getz/Gilberto, sortit en 1964, en collaboracion amb lo saxofonista estatsunidenc Stan Getz; d’aquel album se vendèron de milions de còpias, e João Gilberto ganhèt qualques prèmis Grammy e propaguèt la bossa nova dins lo Mond entièr.

[Poblejat dins www.jornalet.com]