La Reünion: an sancionat un ensenhaire per aver parlat creòl dins un acamp

Se tracta d’un professor de lenga creòla que l’inspector li ordenèt de parlar en francés mas que refusèt

Un ensenhaire de l’illa de la Reünion a recebut un “avertiment solemne” per aver parlat creòl. Lo professor foguèt convocat en abril passat per l’inspeccion, per refús d’obtemperar, çò rapòrta Z Infos 974.

 

S’agís d’un ensenhaire de l’escòla Laurent Vergès al Pòrt, abilitat a ensenhar en çò que nomenan “lenga regionala”. Lo punisson per aver parlat creòl durant una reünion tenguda l’11 de decembre de 2018 en rason d’un incident de classa. L’inspector, present a l’acamp, li ordenèt de parlar en francés jos pena de sancions, mas l’ensenhaire contunhèt de parlar dins la lenga mairala de l’80% dels escolans.

 

En seguida d’aquel avertiment, la Federacion per las Lengas Regionalas dins l’Ensenhament Public (FLARÈP) a lançat una peticion per denonciar “l’actitud escandalosa de l’administracion educativa”. Demandan tanben que se retire aquel “avertiment solemne” e que se publique una circulara academica que reconesca l’usatge de las doas lengas de la region pels ensenhaires, dins l’exercici de lors foncions.

[Imatge: Z Infos 974 - poblejat dins www.jornalet.com]