An creat un ret europèu per defendre e promòure las lengas minorizadas

L’occitan es representat pel Congrès Permanent de la Lenga Occitana

De bascos, catalans, frisons, ladins, tiroleses, galècs e occitans an creat ongan un ret d’institucions lingüisticas per far viure las lengas minorizadas d’Euròpa, ne promòure la coneissença e far respectar la diversitat lingüistica del continent. Del costat occitan, es lo Congrés Permanent de la Lenga Occitana que representa la lenga nòstra, e trabalha amb la Real Academia Galega, l’Institut d’Estudis Catalans, l’Euskaltzaindia, la Fryske Akademy e EURAC - Institute for Applied Linguistics.
 
Segon l’acòrdi que signèron en genièr passat, lo ret se batrà per la reconeissença d’aquelas lengas e los instituts que las representan lucharàn davant l’Union Europèa per ne garentir los dreches lingüistics e l’avenir. En mai d’aquò,  se pensa a l’escambi d’experiéncias dins lo desvolopament de ressorsas lingüisticas e se parla de trabalhar dins una infrastructura numerica comuna.

 
[Imatge: RAG/Euskaltzaindia - poblejat dins www.jornalet.com]