terça-feira, 23 de abril de 2019

Dàvid Grosclaude: las lengas “son aitant de catedralas que crèman”


Lo jornalista bearnés remarca l’excessiu tractament mediatic e patriotic de la catastròfa e afirma qu’”un monument a pas que la valor que se li conferís”
 
 
L’incendi de la catedrala de París l’a amortat una pluèja de milions d’èuros, çò qu’a entraïnat una tièra de reaccions. D’un caire, lo Mond entièr a plorat la catastròfa, de l’autre s’es remarcat que “la pauretat es una decision politica”, coma diguèt Pedro Scher. Quitament lo conegut prèire francés, Guy Gilbert, a deplorat las prioritats de l’argent: “Òsca per las pèiras mas caldriá benlèu abans s’ocupar dels umans”, çò a dich.
 
De soslinhar la reflexion del jornalista e politician occitan, Dàvid Grosclaude, que considèra que la devastacion de la catedrala parisenca es una catastròfa, mas es pas la primièra catedrala a aver besonh d’èsser rebastida. Dins un article publicat dins Le Peuple Breton, Grosclaude remarca l’excessiu tractament mediatic e patriotic de la catastròfa e afirma qu’”un monument a pas que la valor que se li conferís”.
 
A mai, Grosclaude planh la manca de coeréncia que la ten l’emocion dels politicians franceses coma Mélenchon, Macron, Hollande, Fillon, Sarkozy e los autres. “Pòdi pas desmembrar que los meteisses se calan (o de còps que i a se regaudisson) quand aqueles monuments de cultura que son nòstras lengas se consumisson pauc a cha pauc, privats d’atencion e de consideracion, en rason d’una politica destruseira de la diversitat lingüistica”. Dins aquel sens, Grosclaude considèra las lengas “de monuments qu’aculhisson de milièrs d’ans d’istòria, de milions de paginas de literaura e de milions de jorns de l’istòria de l’umanitat”.
 
Aquela manca de coeréncia lo jornalista bearnés la demòstra en citant un discors de Macron sus la francofonia e de declaracions de Mélenchon contra l’ensenhament en breton.
 
 
 
[Imatge: Zufe - poblejat dins www.jornalet.com]

Sem comentários:

Enviar um comentário