Los presidents de las illas Balearas, de Corsega e de Sardenha defendon ensems los interèsses insulars a l’UE

Reclaman lo meteis tractament que los territòris diches ultraperiferics coma Martinica, Maiòta o las Canàrias

Los presidents dels govèrns de las illas Balearas, Francina Armengol; de Corsega, Gilles Simeoni, e de Sardenha, Francesco Pigliaru, se son rescontrats aqueste dimècres  a Brussèlas, ont an presentat un document que defend una posicion comuna a respècte de l’insularitat. De matin, los tres presidents se son amassats e de ser an rescontrat la comissària dels afars regionals, Corina Cretu, dins la sedença de la Comission Europèa.

 
Armengol, Simeoni e Pigliaru defendon qu’Euròpa deu saber reconéisser los desavantatges que los supòrtan las illas a causa de lor condicion geografica, e an reclamat a l’UE una egalitat reala dels dreches de totes los ciutadans, independentament del territòri ont vivon, perque fins ara son estats solament sensibles amb los territòris ultraperiferics. Per tant, demandan a l’UE que compare los dreches de las regions ultraperifericas amb los de las autras illas. “Las dificultats qu’implica lo fach insular son las meteissas tant se la còsta del continent es a 1000 quilomètres coma s’o es a 100”, çò remarquèt Armengol. Concretament, reclaman lo meteis tractament qu’an d’illas coma Martinica o las Canàrias.  

Conférence de presse avec le Président @F_Pigliaru et la Présidente @F_Armengol à Bruxelles. Corse, Sardaigne & Baléares adressent une lettre commune à l'UE et à leurs autorités étatiques respectives pr obtenir la prise en compte de l'insularité dans les pol publiques européennes pic.twitter.com/jxrjnMLPke

— Gilles Simeoni (@Gilles_Simeoni) 6 de febreiro de 2019

Simeoni profechèt de l’escasença per reafirmar als èurodeputats catalans la solidaritat del pòble còrs amb lo pòble catalan e los presonièrs politics.
 
Las illas Balearas, Corsega e Sardenha an dempuèi l’an 2016 un acòrdi de cooperacion,  sustot sus lor posicion institucionala dins l’Union Europèa, “amb independéncia dels estats”. Tanben collabòran sus lo desvolopament del servici maritim, la promocion toristica o la defensa de las culturas autoctònas.

[Imatge: Gilles Simeoni - poblejat dins www.jornalet.com]