Amos Oz | Georges Loinger

Keridos amigos

Komo lo teniya aprometido la semana pasada, oy vos tengo de avlar de dos ombres ke mos desharon los dos el mismo diya, 28 de desyembre pasado, el uno en Tel-Aviv, fue el grande eskrivano Amos Oz, el otro en Paris, fue el grande rezistante Georges Loinger

Saludes a todos,

Edmond Cohen
Paris – Fransya

——————————————————————--------------------------------------------------————————

AMOS OZ | GEORGES LOINGER

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 22 de janvier, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke agora las emisyones de Radio J se pueden oir por internet sovre el sityo de Radio J, sea en direkto, à las 4 h 06 ora de Paris, o kuando se kyere, en klikando sovre las emisyones del djueves despues de mediudiya. http://radioj.fr/node/55

Komo lo teniya aprometido la semana pasada, oy vos tengo de avlar de dos ombres ke mos desharon los dos el mismo diya, 28 de desyembre pasado, el uno en Tel-Aviv, fue el grande eskrivano Amos Oz, el otro en Paris, fue el grande rezistante Georges Loinger.

Empesaremos por Amos Oz, ke nasyo en Yerushalayim en mais 1939. Su kaye se yamava kaye Amos, del nombre del profeta ke es tambyen su nombre. Esta kaye se topa en la male yamada Kerem Avraham (la vinya de Avraham) al norte oeste despues de la Vyeja sivdad, entre las males de Mea Shearim, ande biven los djudyos sufus, i la male de los Bukharim, estos djudyos venidos de Bukhara en el siglo 19. Puede ser pensash ke esto todo no tyene dinguna importansya. Es vedra ke de saver en ke male de Yerushalayim nasyo Amos Oz no es koza indispensavle, ama yene penso ke es interesante de konoser las orijenes de Amos Oz, kuando seriya solo porke este eskrivano tyene un punto komuno kon Victor Hugo, es ke los dos eskrivanos se interesaron a la politika, empesando a la derecha de la derecha, i despues azyendosen ombres de syedra.

El padre de Amos, Yeuda Arie Klausner, era un syonisto de la vanda de los revizyonistos partezanos de Jabotinsky, ke teniya fuido el antisemitismo de la Evropa del este en el empesijo de los anyos trenta, antes mismo, si byen entendi, de la suvida al poder de Hitler en Almanya. Aviya estudyado la istorya i la literatura en Vilno, en Lituaniya. Agora, en Yerushalayim, aviya topado un lavoro de bibliotekaryo, myentres ke su mujer, la madre de Amos, ijo regalado, nasida Fania Mussman, dava lisyones de istorya i de literatura. Afillu si la madre de Fania teniya un molino en Polonya del este (oy en Ukranya) lo aviya deshado para venir en Palestina, i la famiya kedava esnafika. En vedra me demando si aviya en estos anyos djudyos en Palestina ke no sean esnafes.

Komo vos dishe, la famiya de Amos Oz era de la vanda del revizyonisto Jabotinsky, al punto ke un tiyo, Yosef Klausner, del padre de Amos, profesor de literatura ebraïka a la Universita de Yerushalayim, i ke teniya venido en Palestina desde 1919, fue kandidato del Herut a la prezidensya del estado kontra Chaïm Weizmann.

Un drama terrivle afito en la vida de Amos Oz kuando teniya dodje anyos: la muerte de su madre por suisidyo. Deke se suisido? Esto no sé.

Amos Oz mos konta ke kuando teniya 12 o 13 anyos, era fanatiko i militaristo, kreiya en la fuersa militar, i pensava komo Jabotinsky ke «en la sangre i el fuego, Israël se kayo; en la sangre i el fuego, Israel se alevantara».

Kale akodrarvos ke Amos, syendo nasido en 1939, kuando teniya 12 anyos eramos en 1951, kijo dizir poko despues de la shoa i del renasimyento de Israel.

Jabotinsky, muerto en agosto 1940, no vido ni la una ni el otro, ama era un buen profeta ; i kuando uvo la sangre i el fuego, todos savemos ke kaji dinguno aprovo de ayudar a los djudyos, salvo unos kuantos Djustos de bendicha memorya ; no me olvido los askeres de las armadas alyadas, ama no es para salvar a los djudyos que las armadas alyadas izyeron la gerra. I savemos todos tambyen ke es solo por la lucha armada, kijo dizir la sangre i el fuego, ke Israel, atakado por tantas armadas arabas, se salvo en 1948-1949.

Esto dicho, parese ke Amos troka presto de idea, porke, a los 15, se va bivir en el kibuts de Hulda, ande los haverim vyenen de la Gordonya (la organizasyon de la kuala aziya parte Haïm-Vidal Sephiha kuando era mansevo en Beljika) organizasyon serka del partido apoel atsair, ke es un partido sosyalisto. Troka de alkunya, i en vez de Klausner eskoje la alkunya Oz (fuersa).

Es en el kibuts ke empesa de eskrivir, i parese ke lo ke eskrive tyene valuta a los ojos de sus haverim, porke, afillu si el lavoro de kadal diya es dechidado por un sadran avoda (organizador del lavoro), a el le permiten de tomar unos kuantos diyas a la semana solo para eskrivir. Ama no va puvlikar nada antes de los 22 anyos. Kale dizir ke antes tuvo de azer su askerlik, ke izo a la frontera de la Syrya, ke no era una frontera kolay en los anyos sinkuenta ; por tener estado a esta frontera en el kibuts Lehavot aBashan en 1955, lo puedo atestiguar.

Es importante de akodrar ke, en mas de su askerlik, Amos Oz kombatyo en la gerra de los sesh diyas de 1967 en los tankes en el Sinaï, i en la gerra de Kipur en 1973 en el Golan. No tyene lisyones de patriotismo ni de syonismo de resivir de kual ke sea, afillu si tomo syempre pozisyones kontra la okupasyon de la Cisjordaniya i de Gaza, i en favor de una solusyon kon dos Estados. Del partido travayisto al empesijo, se aserko despues del partido Merets, ke iva mas kon sus ideas. Indo mismo mas leshos, embiyo komo regalo kon una dedikas uno de sus livros al palestinyano Marwan Barghouti, portanto kondenado a prezo en Israel por aver matado sinko personas.

Ma aboltaremos al eskrivano, sin yene olvidarmos ke Oz fue syempre un eskrivano kon ideas politikas, i ke algunos de sus livros son haliz livros politikos. Algunos, ma no todos.

Despues de varyos artikolos en la gazeta Davar, el primer livro puvlikado por Amos Oz fue, en 1965, dunke a la edad de 26 anyos, un livro de novelas intitolado Artsot atan (Tyerras del chakal) i despues, en 1966 un roman intitolado Makom aher (Lugar otro) trasladado en franses Ailleurs peut-être.

Despues no va kedar de eskrivir livros i resivir un alay de premyos. Sus livros son trasladados en mas de trenta linguas.

No vos vo dar aki la lista de sus livros, es kolay de toparla sovre internet. Sus livros se esparten en tres kategoriyas: las novelas, los romanes, i los livros ke se yaman essais en franses, iyon en ebreo, diriya pensamyentos. I kale adjuntar una kuatrena kategoriya : su autobiografiya, ke el yamo roman autobiografiko, editada en 2002, i intitolada «Sipur al aava vehosheh», Istorya sovre amor i tinyevlas.

Tengo otras dos kozas de dizirvos, ke no tyenen dingun atadijo entre eyas: la primera es ke Oz fue uno de los fundadores del movimyento «Shalom ahshav» (Paz agora). Ama para azer la paz kale ser dos, i mismo si todos los Israelyanos keriyan la paz (de kualo no so siguro) kale ke los Palestinyanos la kyeran tambyen. Meldi sovre internet un artikolo de un palestinyano, profesor de literatura en la Universita Al Aqsa de Gaza, Haidar Eid, a propozito de la muerte de Oz. Eskrive : «Oz, komo otros syonistos moderados, lucho para el «derecho de Israel de egzistir» (entre komiyas) sin derrokar su sistema kolonyal i de apartheid» (fin de sitasyon). El kamino parese dainda leshos antes de la paz ke keriya Oz…

La sigunda koza ke keriya akodrarvos, es kuanto Oz era un ombre ermozo. Kedo ermozo asta su muerte, ama ay fotos de el mansevo, parese un aktor de sinema. Yo me akodro tenerlo visto verso la fin de los anyos sesenta, en una reunyon syonista en Geneve, avlo en ingles, era maraviyozo.

Oz se muryo a los 79 de un kanser. Tuve la impresyon – puede ser me yerro – ke malgrado sus pozisyones politikas, todos los Israelyanos, inkluyendo los de derecha, saludaron su muerte komo una grande pedrita. Una glorya de los eskrivanos israelyanos, disho el prezidente del Estado.

I agora desharemos a Amos Oz, i avlaremos de Georges Loinger, ke komo vos dishe antes, se muryo el 28 de desyembre, el mismo diya ke Amos Oz, ama el a la edad de 108.

Aviya nasido en 1910, en Strasbourg, en una famiya djudiya sufu de syete kriaturas. Va ser primo ermano de Marcel Marceau i tiyo de la kantadera israelyana Yardena Arazi.

Muestro chiko Georges se va al liseo en Strasbourg i pishin se amostra muy kapache en jimnastik i en sport. En 1925, a los 15 anyos, entra en el movimyento de mansevez syonisto Hatikva ande konose la ke va ser su mujer, nasida en 1911.

En 1929, dunke a los 19, es diplomado de una eskola de injenyeros i lavora en una kompaniya de navigasyon sovre el Rhin asta 1932, ande se va para tomar el diplomo de profesor de jimnastik. Para pagar sus estudyos lavora komo survelyante en el seminaryo, ande aze konosensya kon uno de los profesores, Marcus Cohn, fundador de la eskola Maimonides al lado de Paris. En 1935, lo toma en esta eskola komo profesor de jimnastik.

Agora vo avrir una chika paranteza para dizir tres kozas sin dingun intereso, ama si no las digo me van a kedar en el garon, i esto no es bueno para mi salud:

La primera es ke fui kombidado ay un anyo o dos a komer ande una amiga (sovrebivyente de la shoa) i a su meza aviya un ombre aedado kon su mujer. No se komo vino en el lakirdi, ma avli de Georges Loinger para amostrar komo ay djente muy aedada ke bive sana i rezya afillu su edad. Ah si, me dize el ombre : Georges Loinger, yo lo konosi antes de la gerra, era mi profesor de jimnastik en la eskola Maimonide. De esto yo ya saviya ke Gorges Loinger era profesor de jimnastik en la eskola Maimonide antes de meldarlo sovre Wikipedia.

La sigunda koza es ke fui administrador de esta eskola, i mismo sekretaryo jeneral, durante mas de vente anyos, del tyempo ande el direktor de la eskola era el Haham David Messas, ke despues sera hahambashi de Paris.

La tresera koza es ke mis dos inyetizikos bohores, ke puede ser oyitesh aki a la radyo la semana pasada, i ke biven en Boulogne, son elevos los dos en esta eskola Maimonide.

Agora ya es tyempo de serrar esta paranteza sin grande intereso, i de aboltar a la vida de Georges Loinger. Va entrar ande los scouts djudyos de Fransya, aya tambyen komo profesor de sport, i en los anyos antes de la gerra, se okupa de akojer a los chikos refujyados djudyos fuyendo la Almanya, en un kastiyo de la barona Germaine de Rothschild.

Kuando vyene la gerra, Georges ke tyene 29 anyos se va komo asker, i es su mujer ke va okuparse de los chikos en lugar de su marido. Azyendo el la gerra, es aferrado por los Almanes komo prezonero, ma se fuye fin 1940, i alkansa a topar, al empesijo de 1941 en la sivdad de La Bourboule, en la parte non okupada de la Fransya, su mujer ke aya se pudo ir kon 123 chikos refujyados. De este diya, kon el ayudo del doktor Joseph Weill, uno de sus amigos de Strasborg i direktor de la OSE (ovra de salvasyon a las kriaturas), Georges Loinger va entrar en la red yamada la red Garel, del nombre de su kapo Georges Garel, ke en vedra se yamava Grigori Garfinkel. Avro aki una chika paranteza para dizirvos ke una de las ermanas de Georges Loinger, Fanny, entro eya tambyen en esta red, ama lo van a deskuvrir solo despues de la gerra…Syerro la paranteza. El lavoro de esta red va ser de salvar lo mas posivle de kriaturas djudiyas, de eskonderlas (kon el ayudo de Monseigneur Salièges, ovispo de Toulouse) en famiyas kayolikas, o, mijor, de azerlas pasar en Suisa. I esto va ser el lavoro konfiyado a Georges Loinger. Komo? Azer pasar las fronteras a eskondidas, es un echo ke nunka ize, dize Loinger a Weill, ke le responde: «Ambezate, desbrolyate, ama azelo». I Loinger se va en Annemasse, sivdad de Fransya a la frontera kon la Suisa. Munchos djudyos se esforsaron de pasar esta frontera, munchos reusheron, komo mis futuros suegros, o komo Fanny Ben Ami, de la kuala vos avli aki en una emisyon ke ize el 13 de novyembre 2014 kon el titolo «Fanny Ben Ami, konvoyadera de tredje anyos». Otros no reusheron i fueron aferrados, i syertos torturados i matados komo Marianne Cohn, de la kuala ya vos avli munchas vezes aki.

Loinger yeva las kriaturas a un tereno de futbol al lado de la frontera. Kuando el balon pasa en Suisa, las kriaturas korren a bushkarlo, i no aboltan mas ! Esto es bastante kolay kuando los okupantes son los Italyanos, ke deshan azer. Ma kuando, en septyembre 1943, vyenen los Almanes, va ser muncho mas yuch. Munchos van a ser aferrados. Ama kontinuan. En todo, los istoryanos pensan ke Loinger salvo a 450 kriaturas. El mismo no save. No konto…

Otra ermana de Georges, Emma, lavoro eya tambyen en la Rezistansya. Ay una foto muy ermoza tomada en Israel ande se fue Georges Loinger a la edad de 102 anyos. Fue resivido por el prezidente del Estado, Shimon Peres. Sovre la foto se ven Georges i Emma, su ermana mas chika ke tyene solo 100 anyos…Se ve tambyen otrun chiko ermano ke tyene solo 92, i tambyen sus sovrina, la kantadera israelyana Yardena Arazi.

Este mismo anyo 2013, a los 102, Georges Loinger vyene aki a la radyo ande tyene una entrevista kon Michel Zerbib, el kapo de los gazeteros. Kuando se eskapo la entrevista, Loinger dize a Zerbib un poko enkantado: «Bueno, vos tengo de deshar, porke agora me vo a la pisina…» Despues de la gerra Georges Loinger, ke se aviya echo spesyalista de pasar las fronteras, se okupo de azer pasar a eskondidas los djudyos ke aprovavan de ir en Palestina. Djugo un rolo en el echo del famozo vapor Exodus.

Komo vos dishe, mos desho el 28 de desyembre, el mismo diya ke Amos Oz, a la edad de 108 anyos.

Al djueves ke vyene, si kyere el Dyo !

Edmond Cohen
Paris, Fransya

[Orijen: www.esefarad.com]