Los djudyos de Polonya (3)

Keridos amigos:

Mi emisyon de este djueves va ser la kontinuasyon, de 1825 a 1939, de la istorya de los djudyos de Polonya. Malgrado los pogromes, los djudyos, a la fin de la emisyon en 1939, son dainda 3 milyones i medyo. Estos todos van a dezapareser en matansinas en pokos anyos asta kaer a no leshos de zero. 

Devriya ser mi proksima emisyon, ama no se si tendre gana i koraje para esto.

Saludes a todos,

Edmond Cohen
Paris – Fransya

——————————————————————————————

LOS DJUDYOS DE POLONYA (3)

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, el djueves a las 4h06 despues de mediudiya, ora de Fransya, sea kuando se kyere, kale klikar en el sityo de Radio J, i irse sovre las emisyones de despues de medyudiya.

http://www.radioj.fr/node/55

De otra parte, vos akodro ke el proksimo atelye de konversasyon de Vidas Largas se va tener el martes 20 de novyembre 2018, en el Centre Communautaire, a las dos i medya (asta las kuatro i medya – sinko).

Oy tengo de kontinuar de avlarvos de la trajika istorya de los djudyos de Polonya, ama yene, antes, kyero dizirvos dos byervos sovre la noche del kuatro al sinko de novyembre 1942, ay 76 anyos, noche del aferramyento de mas de mil djudyos gregos (lo mas selaniklis) en esta sola noche de la kuala vos avli la semana pasada.

Vos dishe ke me fundava sovre los testimonyos ke meldi, i vos avli de David Sauleman i de su livro « Deux mètres carrés ». Ama no vos dishe ande aviya topado lo ke vos konti antes de su testimonyo, porke no reushiya a topar de ande lo teniya tomado. Despues de mi emisyon, kontinui de bushkar, i agora ya lo topi : este testimonyo se topa en la pajina 685 del livro de Serge Klarsfeld intitolado « Le Calendrier de la persécution des Juifs en France 1940-1944 » (el kalendaryo de la persekusyon de los Djudyos en Fransya 1940-1944).

Klarsfeld mos dize : «Na la impresyon ke desho este aferramyento a uno de los djudyos gregos ke reusheron a eskapar del aferramyento i ke lo kontaron mas despues en los Cahiers Sefardis » (una revista editada despues de la gerra por Sam Levy, de bendicha memorya, entre 1946 i 1949). I Klarsfeld, kopyando lo ke topo en esta revista, mos da lo ke vos dishe en kurto la semana pasada.

Esto era la primera koza, porke kuando konto una koza, me plaze pueder dar mis fuentes, afillu si mi fuente no es kompleta, syendo ke no sé en kual numero de la revista se topa este testimonyo, ni kualo era el nombre del testigo. Por esto es ke el testimonyo de un David Sauleman es importante. Los romanos diziyan : testis unus testis nullus : un solo testigo es komo dinguno. Ama dos ke vyeron la misma koza, a estos se puede fiar…

La sigunda koza ke vos keriya dizir es ke la polisiya resivyo los komplimentos de los kapos almanes por la buena kualidad del lavoro echo por la polisiya franseza esta noche de aferramyento de los djudyos gregos.

Esto dicho, aboltaremos a los djudyos de Polonya, akodrandovos ande vos deshi la semana pasada:

El djueves pasado, vos estava dizyendo ke en 1825, el tsar Nicolaï Iero, ke reynava agora sovre los djudyos de Polonya syendo ke la parte este del teritoryo de la defunta Polonya se topava ser agora parte del imperyo russo, este tsar ovligo los djudyos de eskojer entre eyos un numero de ombres ke tendran de azer un askerlik de 25 anyos. No tengo menester de dizir la angusya ke fue la koza, indimas ke al kavo de los 25 anyos, el desmazalado, si era mansevo, era konvertido de fuersa al katolisismo.

Esto dicho, todo no fue negro en las desizyones del tsar Nicolaï Iero. En 1844, el Estado russo fragua eskolas djudiyas profanas, ke plazen a los maskilim, kijo dizir los djudyos de la haskala, de las luzes. A la kontra, los djudyos relijyozos se espantan de talas eskolas. De otra vanda, mantyene la zona de rezidensya, ama permite de salir de esta zona si es para ir a las grandes feryas de komersyo, o para estudyar en la universidad. A la kontra, si un djudyo se va del pais sin permeso, pyedre su nasyonalidad. Kon esto todo, se puede yene dizir ke los djudyos son mas o menos bastante kyetos.

El tsar Alexandro II vyene al poder en 1855. Es un tsar liberal, ke proibe de tomar kriaturas para el askerlik. Es mas kolay de salir de la zona de rezidensya, ama las reformas asperadas por los djudyos no vyenen, asta ke el tsar sea asasinado en 1881.

No vos enkantaresh si vos digo ke fueron los djudyos inosentes ke fueron akuzados de este asasinato. De 1881 asta 1884, fue una ola de pogromes kontra los djudyos. I el tsar Alexandro III venido despues akuzo los djudyos de ser a la orijen de estos pogromes, i para kastigarlos, salyo leyes mas i mas negras kontra los derechos de los djudyos. Esto tuvo dos konsekuensas : de una parte, munchos djudyos reusheron a fuirse verso los paizes oksidentales, i sovre todo los Estados Unidos ke los akojeron; esta emigrasyon de masa reprezento, astal kavo de los anyos 1920, asta dos milyones de djente. Savyendo lo ke se va pasar en toda la Evropa durante la Sigunda gerra mundyala, se puede dizir ke los ke reusheron a ir a los Estados Unidos salvaron sus vidas i las de sus desendyentes.

De otra parte, nasyo el movimyento syonisto, mas politiko, mas idealisto, bushkando a emigrar en Palestina para fundar aya un Estado djudyo. Kaliya koraje, ama aki tambyen se puede dizir ke, en mayoriya, los djudyos syonistos van, eyos tambyen, a salvar sus vidas.

En los djudyos ke kedan en Rusiya, ay los ke son travados por las ideas sosyalistas marksistas, sea ke kortan todo atadijo kon los djudyos, komo Trotsky, por egzemplo, sea ke se rekonosen komo djudyos non syonistos, komo los del movimyento konosido komo el Bund, un movimyento de sosyalistos djudyos avlando yidisch, i ke pensavan, i dainda pensan, ke el sosyalismo se deve de kreser i azer en el pais mismo ande se topa el djudyo.

De tal manera ke en el territoryo ke aviya sido polones, los djudyos se meten en vandas diferentes i munchas vezes opozadas : ay los syonistos, ama ande los syonistos ay los sosyalistos laikos del partido Poale tsion (ovreros de Sion), los ke son syonistos, ma ke no son ni sosyalistos ni relijyozos, en el partido de los Tsionim kelalim (Syonistos jenerales) i los syonistos relijyozos de los partidos Mizrahi o Agudat Israel. Ay los relijyozos antisyonistos. Ay los sosyalistos del Bund, djudyos ma non syonistos. Kada uno puede eskojer lo ke kyere !

I al lado de esto todo ay los djudyos revolusyonaryos ke kyeren destruir el tsarismo. Syerto, no puedo avlar de Trotsky, de su haliz nombre Joseph Bronstein, porke el no era polones ma ukranyano, ama, munchos fueron los djudyos nasidos en lo ke era antes la Polonya i ke se fueron de la vanda de los bolshevikos.

Esto dicho, kuando vino la Grande Gerra, los russos se toparon ser enemigos de l’Almanya i de la Austria, lo ke kyere dizir ke los polonezes en jeneral i los djudyos en partikolar ke moravan en los territoryos tomados por los russos se toparon ser enemigos de los polonezes, djudyos o no, ke moravan en los territoryos tomados por los almanes o sus alyados austriakos.

Mas de 500.000 askeres i mas de tres milyones de siviles se muryeron en esta lucha entre ermanos. Entre eyos kuantos djudyos ? No sé. I kuando los Bolshevikos tomaron el poder en 1917 i firmaron una paz kon los almanes en marso 1918 (tratado de Brest-Litovsk), las desgrasyas no se eskaparon para los djudyos. Antes kale dizir ke en 1916 los almanes i los Austriakos permityeron la kreasyon de un reyno de Polonya, ke, a poko a poko, se va engrandeser, ama no esto aki para kontarvos la istorya muy komplikada de la Polonya en estos tyempos. Yene kale ke sepash ke en 1918, syertos djudyos lucharon por la independensya de la Polonya, indo kon Josef Pilsudski, i ke los polonezes pudyeron fundar una republika. Ama djusto despues, de novyembre 1918 asta djulyo 1919, empeso la gerra de la mueva Polonya kontra la Ukranya, para la Galisiya. Por la gerra i por la negosyasyon, los polonezes van a eskapar por tomar la Galisiya oryentala a los Ukranyanos.

Antes ke s’eskape la gerra de la Polonya kontra la Ukranya, en djulyo 1919 komo vos dishe, empeso desde fevrero de este mismo anyo 1919, la gerra de la Polonya kontra la Unyon Sovyetika, kijo dizir los bolshevikos russos, para las fronteras este de la Polonya, gerra ke va surear asta marso 1921.

Lo ke kale dizir, es ke en estas todas gerras (la revolusyon russa, la gerra polono-ukranyana i la gerra russo-poloneza), uvo munchos pogromes. Unas de las razones (si kale topar una razon en esta lokeriya) era ke los anti-bolshevikos akuzavan los djudyos de ser bolshevikos.

Por siguro, los djudyos se kesharon i aprovaron de fuir esto todo. Las gazetas oksidentales i sovre todo amerikanas resivyeron tantos testimonyos ke el prezidente de los Estados Unidos, Woodrow Wilson, mando en Polonya, en 1919, una komisyon de tres ombres, su kapo syendo Henry Morgenthau Senior, un embashador ke se teniya echo famozo komo embashador de los Estados Unidos en el Imperyo Osmanli durante el anyo 1915, i ke de este modo se ambezo el jenosid de los Ermenis, lo denunsyo i aprovo sin dingun rezultado de azerlo kedar.

Morgenthau teniya la konfyensa del prezidente Wilson porke aviya luchado por su eleksyon komo prezidente. Era un djudyo de la vanda reformada de una parte, i antisyonista de otra parte.

Se fue pishin en Polonya kon los dos otros ombres de la komisyon, ke eyos no eran djudyos (Jadwin i Johnson). Lavoraron de djulyo a septyembre 1919. Se fueron en las sivdades ande uvo pogromes. Despues Morgenthau eskrivyo un raporto asigun el kual uvo en Polonya, entre 1918 i 1919, ocho « excesses », byervo ingles para no dizir pogromes, byervo ke no kijo emplear afillu si topo unos 200 o 300 djudyos matados.

Por egzemplo, kuando la armada polaka entra en la sivdad de Pinsk, el 5 de avril 1919, unos kuantos djudyos, entre 75 i 100, son en siduta en el sentro syonisto de la sivdad, para diskutir de la repartisyon de un ayudo en moneda resivido de los amerikanos. Konsiderando ke la siduta es una reunyon de bolshevikos konspirando kontra la armada polaka, el zabit polako aferra a todos, toma 35 de eyos, los aze meter kontra la pared de la katedrala de la sivdad i son fuziyados pishin. Los otros, ombres komo mujeres, son desvestidos i aharvados.

Despues de esta matansina sin dingun djuzgamyento, ni mismo la mas chika investigasyon ke uvyera pishin amostrado ke eran puede ser syonistos, ma bolshevikos no, i ke no teniyan dinguna arma, no solo dinguno va ser kastigado, ma a la kontra el zabit va ser mas i mas alsado asta ser jeneral. Son los djudyos de la komunitad ke van a ser kondenados a pagar una djeza de 100.000 mark, djusto la para resivida de los amerikanos.

Esto es un egzemplo entre otros. Komo vos dishe, en todo muryeron aki i aya unos 300 djudyos. Por siguro es muncho, ama meldi un artikolo (en fransez) eskrito en 2008 por Lidia Miliakova i Irina Ziuzina en la revista Le Mouvement Social i intitolado « Le travail d’enquête des organisations juives sur les pogroms d’Ukraine, de Biélorussie et de Russie soviétique pendant la guerre civile (1918 -1922) » (el lavoro de investigasyon de las organizasyones djudiyas sovre los pogromes de Ukranya, de Bielorussiya i de Russiya sovyetika durante la gerra sivil (1918-1922).

Las dos mujeres ke eskrivyeron este artikolo eskriven ke « el numero de viktimas (de pogromes) ayegava, al kavo del anyo 1921, al shifro de 150.000 muertos : 125.000 en Ukranya (yo adjunto : el pais ke aze asta oy de Chmielnitski un gibor), 25.000 en Bielorussiya i en Russiya. »

Es siguro ke, komparados a estos paizes, sovre todo la Ukranya, 300 muertos en Polonya en 1919 parese poko. Todo es relativo, komo diziya Einstein en estos tyempos. I mismo estos 150.000, kuantos son al lado de los 6 milyones de djudyos matados en la sigunda gerra mundyala, lo mas en estos mismos territoryos…Ama dainda no estamos en esto : dainda mos kedamos en los primeros anyos de lo ke se va yamar mas tadre la entre-dos gerras.

En 1921, la constitusyon de Polonya da a los djudyos los mismos derechos ke a los otros sivdadanos i les da libertad de relijyon.

I es vedra ke, entre 1926 i 1935, Josef Pilsudski governava la Polonya, i el se opozava al antisemitismo, ma despues ke se muryo en 1935, las kozas trokaron para los djudyos, i no en byen.

Empesaron muevos pogromes, komo en 1936 en Pzytyk. No es ke kyero syempre todo travar a mi persona, ama yene sepash ke yo nasi (en Paris) este anyo 1936, i ke mis suegros nasyeron los dos en Przytyk. Ya biviyan en Fransya kuando uvo el pogrom de Przytyk. Ama todas sus famiyas moravan aya. Sovrebivyeron al pogrom, ma no a la Shoah despues.

Entre 1935 i 1937, 79 djudyos fueron matados i 500 feridos en los atakos antisemites.

En 1937, las universidades meten quotas kontra los djudyos, ke bashan de mitad en numero. El mismo anyo los medikos i los avokatos polonezes achetan solo kristyanos. Empleos governomentales son serrados a los djudyos.

Esto todo i munchas otras negriguras empovresen por siguro a los desmazalados djudyos de Polonya ke van a ser los mas proves del mundo. Son unos tres milyones i medyo en 1939.

Ama kale saver ke, afillu estas todas angusyas, los djudyos tyenen una vida kulturala muy aktiva. 116 gazetas, 15 teatros yiddish. En 1920 se djuga El Dibbuk en el teatro Elyzeum (malorozamente un mes despues de la muerte del autor An Ski).

Agora ayegamos a 1939. Los polakos son bastante amigos kon los almanes por varyas razones, por egzemplo komparten kon los almanes el odyo de los djudyos komo de los bolshevikos. Ama esta amistad no va abastar, indimas una vez ke los almanes an firmado un pakto kon los bolshevikos el 23 de agosto.

Una terrivle gerra va empesar una semana despues, el primo de septyembre 1939, ke va eskaparse por la dezaparisyon kaji entera de los tres milyones i medyo de djudyos ke biviyan en Polonya.

Es una koza tan terrivle i ke ya konosesh, ke puede ser no la kontaré en detalyos, kuando eskaparé la istorya de los djudyos de Polonya el djueves ke vyene, si kyere el Dyo !

Edmond Cohen
Paris, Fransya

[Orijen: www.esefarad.com]