Lo nòu disc de Rosalía es inspirat del roman occitan Flamenca

La cantadoira catalana, reconeguda pels prèmis Graamy, a donat una nòva sonoritat al flamenco

Miguel Hernández / Rosalía

La cantadoira catalana Rosalía es venguda l’artista revelacion de l’annada amb son segond disc El mal querer (lo mal aimar), que dona una nòva sonoritat de flamenco amb d’aires de trap, e qu’es inspirat del roman medieval occitan Flamenca.

Sortit lo 2 de novembre passat, lo disc foguèt quitament anonciat sus un ecran gigant sus la plaça de Times Square a Nòva York. De mençonar que l’artista, eissida de l’entorn umil d’un vilage a unes 40 quilomètres de Barcelona, ven de ganhar dos guierdons als Latin Grammy Awards 2018 per doas de las cançons d’aquel album sieu.

Dempuèi sa sortida, El mal querer amolona los elògis, bat de recòrds sus Spotify e a ja vendut mai de 20 000 exemplars.


Flamenca

Lo trabalh de Rosalía es inspirat de Flamenca, un roman occitan medieval anonim del sègle XIII que n’existís sonque un sol manuscrit conegut, lo de Carcassona. Tant lo roman occitan coma l’album de Rosalía explican l’istòria d’una femna que se marida amb un òme gelós, e aquel “amor escur” romp l’autoestima de la femna e emplís de misèria sa vida.

Atal lo nom de cada cançon del disc es acompanhat del títol d’un capítol:

— Malamente (Marridament), capítol 1: Augurio (Auguri)
— Que no salga la luna (Que sortisca pas la luna), capítol 2: Boda (Nòça)
— Pienso en tu mirá (Pensi a ton agach), capítol 3: Celos (Gelosiá)
— De aquí no sales (Sortiràs pas d’aicí), capítol 4: Disputa
— Reniego (Renègui), capítol 5: Lamento (Planh)
— Preso (presonièr), capítol 6: Clausura
— Bagdad, capítol 7: Liturgia
— Di mi nombre (Diga mon nom), capítol 8: Éxtasis (Extasi)
— Nana (Breçairòla), capítol 9: Concepción (Concepcion)
— Maldición (Malediccion), capítol 10: Cordura (Sen)
— A ningún hombre (A cap d’òme), capítol 11: Poder

 
Aquela sequéncia explica las divèrsas fasas de la vida de la femna protagonista de l’istòria, dempuèi los auguris e la nòça, en passant per la gelosiá, las garrolhas, lo patiment, la maternitat e, enfin, l’autonomizacion de la femna, que recobra lo poder sus ela meteissa.
 
An collaborat a aquesta òbra d’artistas celèbres coma Rossy de Palma, l’Orfeó Català o de figuras fòrça conegudas de l’entorn del flamenco.

[Poblejat dins www.jornalet.com]