Sephatrad: Catalonha celèbra uèi sa fèsta nacionala amb de presonièrs e exiliats politics

terça-feira, 11 de setembro de 2018

Catalonha celèbra uèi sa fèsta nacionala amb de presonièrs e exiliats politics

La Diada se debana uèi dins lo remembre del referendum del 1r d’octòbre e dins un encastre de repression perlongada

Per anonciar la Diada, un centenat de
personas s’acampèron dimenge passat
a Brussèlas, jos l’emblematic monument
de l’Atomium. Los acampats dels
reclamèron la libertat presonièrs
politics e dels exiliats, e que se
concretizèsse la Republica

Catalonha festeja uèi sa Diada nacionala amb un govèrn regional en foncions e sos representants legitims en preson o en exili. La Diada a luòc uèi onze meses après que se votèt majoritàriament per l’independéncia dins un referendum reprimit amb violéncia per la polícia espanhòla e dins un encastre d’incertesa après una republica proclamada e non aplicada, jos una repression estatala e amb un cambiament de govèrn en Espanha que, per ara, contunha las meteissas politicas repressivas que lo govèrn precedent.

Demest los divèrses eveniments se tendrà a 17h14 una manifestacion multitudinària que cèrca d’emplir l’Avenguda Diagonala de Barcelona. A ne jutjar pel nombre d’inscriches (aperaquí 450 000) se prevei una manifestacion pus nombrosa que las dels ans precedents. Jol lèma “Libertat, justícia, democracia. Republica Catalana”, la manifestacion anóncia una davalada cauda amb la vista dirigida cap al jutjament dels representants del pòble encarcerats.

Al delà dels presidents de las doas principalas associacions independentistas, totes los que son en preson, exiliats o enseguits en justícia d’autre biais, son d’elegits de las tres candidaturas independentistas votadas pel pòble a las darrièras eleccions regionalas del 21 de decembre passat, convocadas pel govèrn espanhòl.

L’11 de setembre, los catalans se remembran la casuda de Barcelona en 1714 davant las tropas borbonosas. Lo País Valencian èra tombat en 1707 e Malhòrca anava èsser vencuda en 1716. Aquela desfacha representèt la fin de las institucions catalanas e la castelhanizacion del país.

Los presonièrs e los exiliats cridan a la participacion

Diluns passat, tres jornals catalans (Ara, El Punt Avui, El Periódico) publicavan un article signat pels presonièrs politics e los elegits exiliats entitolat “Libertat, justícia e democracia. Republica Catalana”. Dins aquel article, eles fan una crida a la participacion e a emplir las carrièras de Barcelona.

Los setze signataris parlan d’una Diada excepcionala a causa de “l’encastre de repression perlongada” e del recòrd del referendum del 1r d’octòbre passat. Revendican la libertat, la justícia, la democracia e la republica, e considèran que i a una reculada dels dreches dins l’estat espanhòl.

L’article finís que demanda als sindicats, a las organizacion patronalas, als collègis professionals, a las entitats del sector terciari e a tota la societat que s’engatgen a defendre los dreches e las libertats universalas.

L’article l’an escrich ensems de divèrsas presons estant, e tanben de Genèva, Brussèlas e Saint Andrews en Escòcia.

Dimenge passat a Brussèlas

Per anonciar la Diada, un centenat de personas s’acampèron dimenge passat a Brussèlas, jos l’emblematic monument de l’Atomium. Los acampats reclamèron la libertat dels presonièrs politics e dels exiliats, e que se concretizèsse la Republica Catalana.

Demest los representants internacionals i aviá una representacion de Libertat.

La majoritat dels elegits exiliats se tròban en Belgica. Aquí, a Waterloo, i a l’ostal de la Republica Catalana d’ont Carles Puigdemont e son govèrn a l’exili trabalhan per l’internacionalizacion de l’afar e per poder tornar lèu en cò lor en libertat.

Mesa a jorn a 21h00

Un milion de personas segon la polícia de Barcelona an manifestat sus l’Avenguda Diagonala de Barcelona. Jol lèma “Libertat, justícia, democracia. Republica Catalana”, la manifestacion anóncia una davalada cauda amb la vista dirigida cap al jutjament dels representants del pòble encarcerats.