Los jutges tractan los presonièrs politics catalans de “nazis”, “virus”, “gèrmes”, “criminals”, “violents “ e “filhs de puta”, entre d’autres insultes, e afirman que son de “putschistas” amb los qual “cal pas negociar ni mai dialogar”
Escàndol al sen de la justícia espanhòla. Lo jornal Eldiario.esv en de publicar de convèrsas d’un forum comun del Conselh General del Poder Judiciari ont de jutges espanhòls insultan lo movement independentista catalan e sos dirigents. De participants d’aquel chat Internet de l’organ constitucional de direccion del poder judiciari qualifican los presonièrs politics catalans de “nazis”, “virus”, “gèrmes”, “criminals”, “violents “ e “filhs de puta”, entre d’autres insultes.
S’agís de convèrsas que pòdon generar de cadenas de corrics qu’arriban a las boitas e-mail de centenats de jutges de l’estat espanhòl. De fach, totes los jutges i pòdon accedir, legir los messatges, respondre e jónher las convèrsas.
En mai d’insultar grèvament l’independentisme, fan una crida a aplicar lo còde penal e assolidan que çò que se passa en Catalonha es un “afar d’estat” e “de democracia”. Qualques unes comparan la situacion catalana amb lo regim nazi, cridan sovent “viva lo rei” e “viva la polícia”, afirman que los independentistas son de “putschistas” amb los qual “cal pas negociar ni mai dialogar”. Declaran quitament que los “cal perseguir e [que] se son innocents, o dirà la senténcia que serà prononciada”.
Tanben critican l’associacion Jutges per la Democracia, perquè aquesta, fa de temps, afirmèt que los presonièrs politics independentistas avián vist violat lor drech d’èsser defenduts.
Qualques messatges fan veire lo chepic dels jutges espanhòls pels faches d’arunan, en octòbre de 2017 en Catalonha e Aran, pel referendum d’independéncia, e per las protèstas ciutadanas, e mòstran de pensament per la situacion dels jutges espanhòls destinats a aquel territòri. Pasmens, i a pereu de jutges que demandan de calma e desmentisson las “violéncias” que d’unes volián far creire lor existéncia.
Torra exigís que se prenga de responsabilitats e que se libère los presonièrs politics
Lo president de la Generalitat de Catalonha en foncions, Quim Torra, declarèt que "i a pas cap de seguretat juridica pels independentistas", e exigiguèt que se prenguèsse de responsabilitats al Conselh General del Poder Judiciari,que s’identifiquèsse los autors dels messatges e que se liberèsse sul pic los presonièrs politics.
[Poblejat dins www.jornalet.com]
Sem comentários:
Enviar um comentário