Ven de paréisser un sit web que localiza las botigas que parlan la lenga per “que la gent del territòri pòsca viure plenament en catalan”
Ven de paréisser un sit web que localiza los comèrcis de Catalonha Nòrd ont se parla catalan. Lo sit l’a mes en òbra l’organizacion Plataforma per la Llengua amb la tòca d’acoratjar l’emplec social de la lenga del país e de crear d’espacis de sociabilizacion en catalan.
“De poder emplegar la lenga pròpria en anar crompar lo pan, o d’anar al dentista es una part fondamentala de la vida vidanta de quin locutor que siá. Aqueste fach, qu’es tan normal dins plusors territòris de lenga catalana, malaürosament es pas totjorn tant aisit en Catalonha Nòrd”, çò ditz lo sit web, que precisa que sa tòca es “que la gent del territòri pòsca viure plenament en catalan”.
Lo sit es mes en linha amb un centenat d’establiments de totas las encontradas nord-catalanas, mas l’idèa es de n’apondre de mai en mai. Los comèrcis pòdon èsser idenfiticats amb un pegasolet a l’intrada, coma se fa amb lo Label Òc.
Lo directòri fornís de donadas de cada sit coma lo nivèl de catalan que s’i parla, lo sit web, lo telefòn o l’adreiça. Per aquesta, Plataforma per la Llengua denóncia que s’es calgut far servir los toponims en francés en fòrça cases, ja que Google Maps accèpta pas totas las denominacions pròprias del país.
Cal diré que dins lo nòrd de Catalonha, dins lo país catalan que se tròba dins l’estat francés, la dificultat de parlar dins la lenga del país es, dins qualques endreches, fòrça semblabla a la d’Occitània, mas gràcias a una tièra d’accions per la lenga, la cultura e lo país, se pòt de mai en mai viure dignament en catalan.
De vesitar: guiacatnord.cat
[Poblejat dins www.jornalet.com]
Sem comentários:
Enviar um comentário