quinta-feira, 7 de junho de 2018

Totes los estats de l’UE devon reconeisser lo maridatge omosexual contractat dins d’autres estats

La Cort de Justícia de l’Union Europèa ditz que lo drech de residéncia dels ciutadans de l’UE e de sas familhas inclutz los maridats del meteis sèxe

Totes los estats membres de l’Union Europèa devon acceptar lo drech de residéncia dels conjonches omosexuals, quitament los que reconeisson pas lo maridatge per totes, segon çò que decretèt dimècres passat la Cort de Justícia de l’Union Europèa (CJUE).
 
La cort europèa prononcièt sa senténcia en seguida del cas d’Adrian Coman, un ciutadan romanés maridat a Brussèlas amb Clai Hamilton, ciutadan estatsunidenc. Coman demandèt lo drech de son marit de demorar legalament amb el en Romania. Pasmens, Romania respondèt qu’o podiá pas acceptar perque, e mai siá membre de l’UE, lo país reconeis pas lo maridatge omosexual e podiá pas considerar Hamilton coma conjonch de Coman.
 
Ara la CJUE a tombat la decision romanesa e soslinha “l’obligacion d’un estat membre de reconeisser un maridatge omosexual contractat dins un autre estat membre”, e mai se la tòca es solament “lo drech de residéncia d’un ciutadan d’un estat tèrç”. Segon los jutges europèus, aquela reconeissença afècta pas negativament l’institucion del maridatge dins l’estat receptor del conjonch ni tanpauc l’obliga de cambiar sas leis.

 
 
La senténcia especifica que lo concèpte de “conjonch” dins la lei europèa compren las personas del meteis sèxe e garentís la libertat de residéncia dels ciutadans de l’UE e dels membres de sa familha. “E mai los estats membres ajan la libertat d’autorizar o non lo maridatge omosexual, pòdon pas empachar la libertat de residéncia d’un ciutadan de l’Union en refusant a son conjonch del meteis sèxe, ciutadan d’un estat non-membre de l’Union, la concession d’un drech de residéncia derivat dins son territòri”, çò precisa la CJUE.





[Imatge: Vadim Ghirda / Associated Press - poblejat dins www.jornalet.com]



Nenhum comentário:

Postar um comentário