La santa colèra de Claudi Alranq contra la traïson de l'esquèrra francesa

“Aquela descentralizacion que quand avèm agut lo pè sus l’escala se son servits de la lei per nos enterrar”, çò diguèt l’òme de teatre sus Òc Tele

Lo celèbre òme de teatre Claudi Alranq a mostrat sa colèra contra la traïson de la dicha esquèrra francesa qu’en nom del progrès empachèt tot reviscolament occitan. Dins una entrevista animada per Dàvid Grosclaude sus Òc Tèle, Alranq explica que cinquanta ans après aquel Mai de 68 lo centralisme es totjorn vivent. Aquela “descentralizacion” que l’esquèrra francesa evocava es per el pas mai qu’una “desconcentracion”. “Aquela descentralizacion que quand avèm agut lo pè sus l’escala se son servits de la lei per nos enterrar”, çò precisèt.

 

“Ma generacion, los qu’avèm fach lo «teatre de la carrièra» seriam pas venguts a l’occitanisme se i aviá pas agut aquela desrevelhada internacionala ont i aviá Vietnam, l’antiapartheid, las primièras idèas de liberacion quala que siague contra l’autoritat, la sexualitat, etc. Tot aquò l’avèm poscut ligar a aquela revendicacion rock and roll, aquela liberacion de las tripas e de la cervèla l’avèm poscut viure unicament perque a un moment donat avèm poscut faire lo pont entre aquela sentida de liberacion anticolonialista, antisexuala, e tot aquò, amb un colonialisme interior qu’avèm pistat dins nòstre país, que sèm estats obligats de fugir per anar crostar en defòra.” 

 

En evocant l’esperit de la cauma dels carbonièrs de la Sala, Alranq contèt l’occitanisme qu’aviá atirat lo mond progressista. “Reconquistarem pas la lenga se reconquistam pas lo país”, çò diguèt en remembrant qu’”es per aquò que Lafont e qualques unes sortiguèron, tot en demorant, de l’IEO e creèron lo COEA perque concebèron aquel concèpte de colonialisme interior”, un concèpte que s’èra pas existit, “pas jamai de [sa] vida [auriá] rescontrat l’occitanisme”.

 

L’entrevista se debanèt dins l’emission d’abril de 2018 del D’ÒC Show d’Òc Tèle, rodada al CIRDÒC de Besièrs sul tèma de Mai de 68. L’emission foguèt fòrça rica amb las intervencions de Joan-Pèire Laval, Jean Huillet, Joan-Loís Escafit, Mans de Breish, Joan Larzac, Rotland Pecot, Claudi Alranq, Aurélien Bertrand, Lisa Gròs, Patric Roux, Patrici Bacou, Alice Champollion, Maud Seguier.

 

Dins lo vidèo que seguís, podètz veire un extrach de l’entrevista d’Alrancq. L’emission completa la podètz trobar en linha sul sit d’Òc Tèle.

 

 
 
 

[Poblejat dins www.jornalet.com]