Brasil: los pòbles originaris manifèstan per lors tèrras e lors vidas

Segon los manifestants, los pòbles indigènas son a viure la situacion pus grèva d’atacas de lors dreches dempuèi la redemocratizacion del país en 1988

Tres milièrs de personas, sortits d’un centenat de pòbles, an participat a Brasília a la 15a edicion de l’Acamp Tèrra Liura. Jos lo lèma “Pro de genocidi indigèna, demarcacion ara!“, los manifestants an exigit del govèrn que se protegisca lo drech de dispausar de lors tèrras ancestralas e que s’acabe la violéncia que patisson los pòbles indigènas. Vòlon pas èsser expulsats de lors païses en seguissent los òrdres dels responsables de las companhiás minièras, dels latifondistas e de las entrepresas de construccion. De soslinhar que lo govèrn actual de Michel Temer a suspendut las negociacions amb los pòbles indigènas sus la demarcacion e, eventualament, sus l’atribucion de lors tèrras.

 

Segon los manifestants, los pòbles indigènas son a viure la situacion pus grèva d’atacas de lors dreches dempuèi la redemocratizacion del país en 1988, coma se pòt legir dins lo manifèst signat per l’Associacion dels Pòbles Indigènas de Brasil. E mai denóncian la connivéncia del govèrn de Temer amb los grands latifondistas. 

[Imatge: apib.info - poblejat dins www.jornalet.com]