Qualques deputats franceses vòlon una lei que diga que lo provençal es pas d'occitan

La FÈLCO a reagit a “aquel genre d’ofensiva particularista”

Qualques deputats franceses venon de depausar una proposicion de lei que cèrca de far reconéisser lo provençal coma una lenga diferenta de l’occitan. Aquela proposicion seguís l’iniciativa del deputat Bernard Reynes, cònsol de Castèu-Rainard (Crau) e sòci del Collectiu Provença, que demanda que l’Educacion dicha nacionala prenga en compte lo “sistèma ortografic mes en òbra per Frederic Mistral” que donariá, segon el, “au provençau parlat e escrich son plen estatut de lenga”.

 

La FÈLCO, qu’es la federacion dels ensenhaires d’occitan dins l’escòla publica, a reagit amb energia. D’un latz, precisa que los tèxtes oficials de l’Educacion nacionala apèlan nòstra lenga “occitan lenga d’òc” en n'indicant sas variantas regionalas dont lo provençal.

 

“Aquel genre d’ofensiva particularista se limitava a qualques questions escrichas que recebián de responsas perfièchament claras, comprensiblas, e de segur negativas”, çò ditz la FÈLCO dins son comunicat, del temps qu’a mandat una letra a l’autor del projècte de lei, Bernard Reynès, una autra als deputats signataris e una tresena especifica pel deputat breton Marc Le Fur, egalament signatari.

 

“Es perque lo provençal fa partida de la lenga d’òc que los estudiants de Montpelhièr, coma los de Tolosa, de Pau, de Bordèu, de Lemòtges, de Clarmont-Ferrand e de tot segur d’Ais e de Niça, legisson e estúdian MIstral, lo cevenòl Fabre d’Olivet, coma lo marselhés Victor Gelu, o Delavoët, lo poèta de Grans, lo niçard Francís Gag o Robèrt Lafont que ven de nos quitar, un grand occitanista que tota son òbra literària es escricha en provençal. Es dins l’unitat de la lenga d’òc que lo provençal pren tota sa plaça”, çò ditz la FÈLCO.

 

En mai d’aquò, la FÈLCO precisa que “çò que manca a la lenga d’òc de Provença, al provençal, es que sa reconeissença se doble de mesuras efectivas de sosten”. Dins aquel sens, los ensenhaires remembran als provençalistas la situacion legala de la lenga, coma per exemple que dempuèi plusors annadas i a pas que quatre pòstes al CAPÈS per sèt acadèmias. La FÈLCO lor suggerís qu’intervengan en aqueles afars: “Se i arribatz rendriatz al provençal e tota la lenga d’òc un senhalat servici!”.

 

Podètz legir las reaccions de la FÈLCO sul sit de la federacion d’ensenhaires.

L'Assemblada Nacionala Occitana s'es tanben mobilizada.

[Imatge: YouTube - poblejat dins www.jornalet.com]