Los djudyos de Rusiya (2)

Keridos amigos

Mi emisyon de djueves va ser la kontinuasyon de mi presedente emisyon sovre los djudyos de Rusiya, esta vez entre 1903 i 1945. Komo djueves va ser Yom aShoa, insisti sovre lo ke fue la Shoa en la Unyon Sovyetika, ande la kuala fueron matados 2.600.000 djudyos, no leshos de la mitad de las viktimas de la Shoa (los djudyos de Polonya i de Ungariya azyendo una grande parte de la otra mitad).

Saludos a todos
Edmond Cohen
Paris – Fransya

———————————————————————

LOS DJUDYOS DE RUSIYA (2)

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 15 de mais, a las dos i medya, en el Centre Communautaire. Venid munchos.

Vos akodro tambyen ke las emisyones de Radio J se pueden oir por internet sovre el sityo de Radio J, de toda manera en direkto, i tambyen despues en la redifuzyon de la mediudiya entera.

http://www.radioj.fr/node/55

Esto dicho, oy es Yom aShoa, i la radyo me demando de azervos oy una emisyon en relasyon kon este diya, kijo dizir kon la Shoa.

De un otro lado, la ultima vez ke ize aki una emisyon, fue el 22 de marso ande empesi una emisyon sovre los djudyos de Rusiya, i tuve de desharvos sin tener tyempo de eskaparla, kedandome en 1903.

I me pensi ke en Yom aShoa, eskapar mi emisyon sovre los djudyos de Rusiya, de 1903 asta oy tendriya, malorozamente, un grande atadijo kon la Shoa, no solo porke serka de la mitad de los matados de la Shoa lo fueron sino en la sola Rusiya, ma en la Unyon Sovyetika, ama ensima fueron todas las otras desgrasyas ke sufriyeron los djudyos de Rusiya, i antes de la primera gerra mundyal kon los pogromes, i durante esta primera gerra, i durante la gerra sivil despues, i durante el stalinismo antes de la sigunda gerra, i por siguro kon la Shoa durante esta sigunda gerra, i las desgrasyas no se van a kedar despues de la gerra, kon el antisemitismo, el antisyonismo i la persekusyon de los refusnikes.

Por esto me parese ke la istorya de los djudyos de Rusya de 1903 asta oy kave muy byen kon el Yom ashoa i kon lo ke me fue demandado por la radyo.

Kuando vos deshi, vos estava dizyendo ke el anyo 1903 fue un anyo de terrivles pogromes, el mas famozo syendo el de Kichenev en Moldavia (49 matados, 586 feridos) ama uvo otros tambyen en varyas sivdades inkluyendo Odessa.

Lo mas terrivle es ke no solo el governo ruso deshava azer, ma en sima el mismo echava azete sovre el fuego. Son los servisyos sekretos del governo ruso ke salyeron los famozos “protokoles de los Savyos de Sion”, sözde eskritos por los kapos del puevlo djudyo ke kyeren konkistar el mundo entero. Esta angusya, dainda oy, es puvlikada en los paizes arabos.

En 1905, empesa en Saint-Petersborg lo ke se va yamar una revolusyon, en vedra una serye de rebueltas en en el pais entero a lo largo del anyo, mas konosida de la djente por lo ke se paso en Odessa asigun el filmo echo vente anyos mas despues por Serguei Eisenstein, a propozito de la rebuelta de los marineros del vapor militar Potemkine, ande amostra los militares travando sovre lo povlasyon de Odessa, kon una chika arabaika de bebiko bashando una eskalera monumentala.

En fakto, las rebueltas se azen en la Rusiya entera, i en mismo tyempo, ay muevos pogromes, sea kontra los djudyos vistos todos komo bolshevikos, sea mismo kontra los djudyos vistos komo tsaristos…komo si los poveretos de djudyos eran partezanos del Tsar. No es ni la primera vez ni la ultima vez ke los djudyos son akuzados de ser de la parte de sus mas krueldes enemigos. Ya vos konti, por egzemplo, en mi sigunda emisyon sovre los djudyos de Irak komo, en 1947, djudyos komunistos antisyonistos fueron enkolgados komo syonistos. Tambyen mos akodramos de lo ke afito a los desmazalados djudyos de Almanya refujyados en Fransya despues de 1933, i ke, kuando empeso la gerra en septyembre 1939, fueron aferrados por la polisiya franseza komo enemigos de la Fransya i echados en kampos. Kuando en julyo 1940 vinyeron los Almanes i el governo de Vichy, este governo dyo a los almanes los desmazalados djudyos enserrados en los kampos, ke sean en zona okupada o no. I lo todo se eskapo en Auschwitz.

Ama esto mos alesha de la Rusiya, ande mos tenemos de aboltar para avlar de los pogromes ke aharvan a los djudyos en los anyos 1905 i despues. De la vanda de los pogromistos ay por egzemplo la organizasyon dicha de los Syen Pretos. De la vanda de los djudyos, Jabotinski lucha para la organizasyon de grupos de autodefensa. Los pogromistos empesan de tener muertos eyos tambyen, i esto es koza mueva. Ay pogromes en Oleksandria, Melitopol, Jitomir, Simferopol, Minsk, Brest, Byalistok, Ekaterinoslav. Ama, por egzemplo, en Ekaterinoslav, uvo, grasyas a los grupos de autodefensa, mas muertos ande los pogromistos ke ande los djudyos.

Me kedo de dar nombres de sivdades, porke, asigun un istoryano ruso yamado Stepanov, en el solo mes de oktovre 1905, uvo 690 pogromes en 102 sivdades diferentes (lo ke kyere dizir, si entendi komo kale, ke uvo mas o menos syete pogromes uno detras de otro el mizmo mez en kada una de estas 102 sivdades). Los solos pogromes de oktovre mataron a lo manko a mas de 800 djudyos asigun un istoryano, 4.000 asigun un otro. Mas de 300 en Odessa, mas de 150 en Rostov sovre el Don, 67 en Ekaterinoslav, 54 en Minsk, mas de 40 en Simferopol, mas de 30 en Orcha.

En 1906, un pogrom en Gomel, uno en junyo en Bialystok (unos 80 matados), uno en agosto en Siedlce (unos 30 matados). Esto todo kon el ayudo de los pulises i askeres kuando los desmazalados djudyos atakados los yaman, kreyendo ke eyos van a salvarlos.

En 1911 empesa en Kiev, oy kapitala de la Ukranya, el echo Beilis, djudyo akuzado de tener matado el 12 de marso a una kriatura kristyana. Va ser djuzgado en 1913. Van a venir ekspertos para dar a entender a la Korte ke es konosido ke los djudyos tyenen menester de sangre kristyana para aparejar la matsa de Pesah. Vos akodro ke la kriatura fue matada en marso, kijo dizir serka de Pesah.

Ama los avokatos de Beilis obtyenen ke el testigo ke aviya asegurado tener visto a un djudyo yevando a la kriatura atorge delantre la Korte ke, en vedra, aviya sido “emburujado” (“embrouillé”, “confused”, ansina meldi sovre Wikipedia) por la polisiya sekreta del Tsar.

Al kavo Beilis fue inosentado i liberado, ama este echo mos amostra mas de todo en ke tyempos de Edad Medya se topava dainda el Imperyo riuso del tyempo de los Tsares.

(Aki me permito de avrir una chika paranteza a propozito del echo Beilis. En 1966, Bernard Malamud, eskrivano djudyo amerikano de orijen rusa, eskrive un livro travado de esta istorya, intitolado The Fixer (el adovador; en franses, l’homme de Kiev), i de su livro John Frankenheimer izo en 1968 un filmo kon el mizmo titolo. La televizyon franseza dechido de amostrar este filmo a la tadre del 2 de avril 1974. Salvo ke, esta noche, a las 9 de la tadre, se muryo Georges Pompidou, ke era el prezidente de la Republika, i ke poko tyempo despues, mirando el filmo, resivi de un primo el haber por telefon, me meti a la radyo i nunka pude ver el kavo del filmo. Syerro la paranteza).

Esto dicho, el echo Beilis se eskapa en 1913, i vyene despues, en 1914, la gerra kontra los Almanes, durante la kuala uvo syertos pogromes, ma sin matansina. Kuando los revolusyonaryos menshevikes i despues bolshevikes toman el poder en 1917, dan a los djudyos los mismos derechos ke los otros rusos, i por siguro los djudyos ven los revolusyonaryos kon amistad.

Ama en mismo tyempo va empesar una terrivle gerra sivil entre los bolshevikos al poder i los otros, ke van de los menshevikos a los tsaristos i ke por esto no son unidos.

No esto aki para azervos la istorya de esta terrivle gerra sivil ke va surear de 1918 asta 1923 i mismo 24, ama solo para kontarvos kuanto los dkudyos sufriyeron en estos anyos. Asigun el istoryano Oleg Boudnitski, solo entre 1918 i 1920, i solo en Ukranya, uvo unos 1.500 pogromes en 1.300 lugares diferentes. Asigun las evaluasyones, entre 50.000 i 200.000 djudyos fueron matados o feridos. Asigun el istoryano ingles Norman Cohn, entre 1918 i 1921 uvo 100.000 djudyos matados. Dainda no estamos en la Shoa, ama los shifros ya azen pensar a la Shoa, i por esto es ke me pensi ke avlarvos de la istorya de los djudyos de Rusiya mismo antes de la sigunda gerra mundyala no mos alesha tanto del kuadro del Yom aShoa, afillu si dainda no ayegimos a la sigunda gerra mundyala.

I komo no tengo bastante tyempo para todo kontarvos, pishin vo ayegar a la parte ande estamos al sentro, al djiger, de la Shoa, kijo dizir la entrada de la Almanya en URSS, el 22 de junyo 1941. Afillu si aviya sido akavidado por sus servisyos sekretos, Stalin no kreiya ke iva ser atakado por los Almanes, i no se teniya aparejado de kuakyer manera ke sea a la invazyon almana. De tal manera ke los Almanes entraron en la Unyon Sovyetika comme dans du beurre (komo en manteka), komo se dize en franses.

Halbuki, la mayor parte de los djudyos de la URSS, la URSS ke auniya a la Rusiya los paizes baltos, la Byelorusiya, la Ukranya i, asigun el pakto jermano-sovyetiko, una parte de la Polonya, moravan serka de las fronteras kon los nazis.

Tres milyones a lo manko de djudyos se toparon en los territoryos okupados por los nazis, i sovre estos tres milyones, unos 2.600.000 fueron matados, kijo dizir ke, komo lo dishe al empesijo de esta emisyon, serka de la mitad de los muertos djudyos de la Shoa lo fueron en la Unyon Sovyetika.

Muncho tyempo me krei ke la Shoa fue dechidada en janvier 1942 kon la Konferensya de Wannsee. Era un muy grande yerro: la Shoa empeso desdel empesijo de la gerra i la entrada de los almanes en Polonya en septyembre 1939. Entre septyembre 1939 i la primavera 1940, los SS ya mataron unos 50.000 a 60.000 personas, en mayoriya djudyos.

Ama estas matansinas artizanales se van a organizar kon la entrada de los almanes en Unyon Sovyetika. Al empesijo mataron komo les veniya, ama muy presto se organizaron. En el anyo 1941, dunke antes de Wannsee, medyo milyon de djudyos son matados en sesh mezes entre julyo i desyembre.

Antes mismo de la gerra los kapos SS Himmler i Heydrich aviyan metido en pye lo ke yamaron einsatzgruppen (palavra por palavra, grupos de intervensyon, ama en vedra grupos de eksterminasyon), i pishin entran en Unyon Sovyetika, dunke en 1941, antes de la konferensa de Wannsee, i empesan lo ke fue yamado la Shoa por kurshumes. Ya ize en janvier 2013 una emisyon sovre esta forma de Shoa. Kuando se avla de shoa en oksidente, se pensa sovre todo a los kampos de eksterminasyon por el gaz ziklon B (Auschwitz, Treblinka, Sobibor, etc). Ama no kale olvidar ke en Unyon Sovyetika, la Shoa fue lo mas por kurshumes, en kondisyones de una krueldad tan terrivle ke mismo solo de kontarlo me vyene muy a fuerte.

Ama oy es Yom aShoa i vos tengo de meldar unos chikos pedasos de lo ke dishe en mi emisyon de 2013:

Los einsatzgruppen no se kontentan de matar eyos mismos, enkorajan tambyen la povlasyon lokala a azer eyos mismos pogromes, dizyendo ke los djudyos son de la NKVD, la polisiya sekreta sovyetika. Poko importa ke sea falso, la NKVD es tan aborresida por la povlasyon ke ya aborresiya de toda manera a los djudyos, ke los almanes munchas vezes no tyenen menester de nada azer.

Heydrich, el 29 de junyo 1941, eskrive ke no kale impedir a los antisemites lokales de matar eyos mismos a los djudyos ; al kontraryo, kale enkorajarlos, ama kon diskresyon.

De toda manera ya entenditesh ke 3.000 ombres, los de los eisatzgruppen, no uvyeran podido matar a milyon i medyo de ombres, mujeres i kriaturas sin el ayudo de la povlasyon lokala, de las polisiyas almanes i lokales i de la Wehrmacht.

Por egzemplo, el 23 de junyo 1941, el einsatzgruppe A no tyene difikultad para solevantar a un pogrom en la sivdad de Kaunas, sigunda sivdad de Lituaniya.

La djente aharva a los djudyos kon palos asta matarlos. Las mujeres se meten un poko mas leshos kon las kriaturas para mirar el espektakulo.

En Ukranya, los primeros diyas de su entrada, el sonderkomando 4b del einsatzgruppe C dize ke no tyene kaji nada de azer. Solo dizen ke los djudyos son de la NKVD, la polisiya sekreta rusa.

En la sivdad de Brzezany, por egzemplo, la mayoriya de los djudyos son matados por los ukranyanos kon palos de eskova ande metyeron klavos. Se meten de dos lados i azen pasar los djudyos entre los dos lados, i ansina los matan kon los palos.

Los matadores, almanes o no, no solo teniyan dinguna piadad, ama munchas vezes teniyan un sadismo syerto, afillu si, kuando fue djuzgado despues de la gerra, uno de estos matadores (Viktors Arajs, un ayudante leton) disho ke si echavan a los bebikos en el ayre para travar ensima, no era para djugar, ama solo para ke no ayga risko de kurshum ke venga atras. En vedra toparon tambyen mas ekonomiko de azer kaer el bebiko sovre la bayoneta del tufenk. Esto no lo meldi sovre internet, es koza ke me akodro tener meldado de los testimonyos en Israel durante el djusgamyento de Eichmann . Oyi tambyen el padre Desbois kontar ke, para ekonomizar un kurshum, los matadores demandavan a la madre de meterse en frente kon su bebiko en los brasos, para matar en djuntos a la madre i al bebiko kon un solo kurshum.

Para no gastar demaziya kurshumes, los almanes van a tomar un prinsipyo : un djudyo, un kurshum. Los djudyos son forsados de kavakar grandes tombas i de meterse delantre, frente a la foya. Son matados por detras, de un kurshum en la espalda. Poko importa, en vedra, si son muertos o solo firidos : lo ke importa es ke kaigan en la foya. Munchas vezes son solo firidos, i lo ke va matarlos es la pedrita de sangre de una parte, i la tyerra echada sovre eyos. Se mueren aogados. Las kriaturas son echadas bivas en la foya, para no gastar un kurshum.

Aki me vo kedar. Oy es Yom aShoa. Por esto tuve de apesgarme un poko sovre esta parte de la istorya trajika de los djudyos de Rusiya. Tendré menester de otra emisyon para avlarvos de la istorya despues de la gerra, antes i despues de la muerte de Stalin.

Al djueves ke vyene, si kyere el Dyo!

Edmond Cohen
Paris, Fransya

[Orijen: www.esefarad.com]