Brasil: lo dòl es vengut protèsta e lucha

De manifestacions dins tot lo país contra la brutalitat policièra an seguit l’assassinat d’una conselhièra municipala cariòca engatjada

L’assassinat de Marielle Franco a esmogut tot Brasil, e lo dòl es vengut protèsta, lucha e de manifestacions. Mentre que se tenián las funeralhas, dijòus passat, de milièrs de personas marchavan per carrièras dins las principalas vilas de tot lo país e denonciavan lo crime amb de lèmas contra la violéncia de la polícia militara en demandant de responsabilitats a las autoritats.

 

Conselhièra municipala a Rio de Janeiro engatjada pels dreches dels paures, Marielle Franco aviá entamenat una lucha contra la brutalitat policièra dins las favelas, aqueles enòrmes quartièrs que figuran pas sus cap de mapa e patisson de violéncias, fusilhadas, agressions sexualas, etc. Qualques jorns abans d’èsser tuada, aviá denonciat los abuses de la polícia dins aqueles quartièrs e s’opausava amb fermetat a la nòva politica del govèrn brasilièr de desplegar l’armada per conténer la violéncia dins las favelas.

 

Marielle Franco, de 38 ans, rintrava a son ostal en veitura après participar a un acte politic quand una autra automobila se sarrèt d’ela; i davalèt un òme que la fusilhèt. Ela e lo menaire moriguèron a l’instant, del temps que son assistenta subreviviá a l’ataca.

 

[Poblejat dins www.jornalet.com]