Jerusalèm: lo Sant Sepulcre es excepcionalament barrat coma mesura de protèsta

L’estat d’Israèl vòl metre en plaça una collècta d’impòstes sus las proprietats eclesiasticas consideradas coma “comercialas” e dobrís la pòrta a una eventuala expropriacion de las bastissas religiosas

La glèisa del Sant Sepulcre de Jerusalem a tampadas sas pòrtas indefinidament a pla demanda de las principalas glèisas crestianas que gerisson lo sit. Aquel endrech màger del crestianisme, ont segon la tradicion foguèt sepelit Jèsus Crist, es ara barrat coma mesura de protèsta contra la decision de l’estat d’Israèl de metre en plaça una collècta d’impòstes sus las proprietats eclesiasticas consideradas coma “comercialas”. En mai d’aquò, lo govèrn de Benjamin Netanyahu dobrís la pòrta a una eventuala expropriacion dels edificis religioses.

“En signe de protestacion avèm decidit de prene la mesura sens precedent de barrar la glèisa del Sant Sepulcre”, çò anoncièron dimenge passat los responsables grècs ortodòxes, apostolics armènis e catolics romans. Dins una conferéncia de premsa, lo patriarca ortodòxe Theophilos III, lo patriarca armèni de la ciutat,  Nourhan Manougian, e lo custòdi de Tèrra Santa, Francesco Patton, legiguèron un escrich de protèsta davant la glèisa. Los caps religioses denoncièron una campanha contra los crestians qu’es arribada a “un nivèl sens precedents amb los òrdres escandaloses de la comuna de Jerusalèm de sequestrar de bens de las glèisas, de proprietats e de comptes bancaris per far pagar d’impòstes municipals punitius”. Creson qu’aquelas decisions “trencan los acòrdis existents e las obligacions internacionalas que garentisson los dreches e los privilègis de las glèisas” e o veson coma  “un ensag d’afeblir la preséncia crestiana a Jerusalèm”.

 

[Poblejat dins www.jornalet.com]