Galícia: una quarantena de collectius s'amassan per l'autoderminacion

La tòca de la plataforma nomenada "Via Galega" es “d’organizar la societat” a l’entorn del principi del drech d’autodeterminacion amb un accent social marcat

Es nascuda una nòva plataforma sobeiranista en Galícia. Se nomena Via Galega e se presentarà en public lo 3 de març que ven, çò rapòrta Nationalia. Via Galega es lo fruch dels acòrdis de divèrses collectius que se son amassats pendent los meses de decembre e genièr passats.

 
Un dels collectius que bandís l’iniciativa es lo sindicat CIG, qu’explica que la tòca es “d’organizar la societat galèga” a l’entorn del principi del drech d’autodeterminacion de la nacion galèga, amb un accent social marcat davant la situacion “d’urgéncia” qu’es a patir lo país a l’ora d’ara a causa del caumatge, de l’emigracion e del desmantelament dels servicis socials.
 
Ongan, Via Galega vòl menar a bon tèrme de presentacions per tot lo territòri galèc e elaborar una “carta de dreches del pòble galèc”, que vòl aver alestida en novembre. 

[Poblejat dins www.jornalet.com]