Catalonha: Occitània es a l’onor de l’escòla de musica tradicionala del Pirenèu

L’escòla mai prestigiosa de musica tradicionala de Catalonha prepausa ongan un viatge per la “cultura e la musica populara d’Occitània”

Occitània es ongan a l’onor de l’Escòla Folk del Pirenèu, de colònias per de joves musicians —d’entre 7 e 18 ans— de musica tradicionala que se tenon en Catalonha.  L’eveniment se debana en dos torns, un del 24 de junh al 1r de julhet e l’autre del 14 al 21 de julhet.

 

Ongan se crearà una orquèstra amb los musicians inscriches dins los dos torns qu’interpretaràn una tièra de concèrt e bal. La còla de l’Escòla Folk del Pirenèu aprèsta un repertòri per l’espectacle amb divèrses arrenjaments segon los nivèls tecnics dels escolans e en los adaptar als diferents instruments dels participants. Cada an, la seguida vira a l'entorn d’un tèma concret, e ongan cèrca d'èsser un viatge per la “cultura e la musica populara d’Occitània, un viatge per aquel país fraire de la man de las formacions qu’an fach una relectura de sa musica tradicionala coma Perlinpinpin Fòlc,  Lou Dalfin,  Gadalzen, Cap Negre, Pierre Roux...”

 

Per mai d’informacion sus aquela escòla, suls prèses, inscripcions, professors, etc., podètz vesitar son sit web o ben sa pagina Facebook.

 
 

[Poblejat dins www.jornalet.com]]