Lo president del Conselh Regional de Bretanha assegura que la reconeissença de l’especificitat de Corsega “es una oportunitat” per que Bretanha “faga valer sas conviccions”
Bretanha suggerís d’aver son “drech a la diferenciacion”. Lo president del Conselh Regional de Bretanha, Loïg Chesnais-Girard, considèra que lo discors qu’Emmanuel Macron faguèt la setmana passada a Bastia, ont prometèt de reconéisser l’especificitat de Corsega, “es una oportunitat” per que Bretanha “faga valer sas conviccions e de proposicions”.
Chesnais-Girard, del Partit Socialista, fa referéncia al “drech a la diferenciacion e a l’autonomia fiscala que correspondon a de desirs ja exprimits per Bretanha”.
Segon lo president del conselh regional, “Bretanha a totjorn obrat per que las regions sián reconegudas, que lor capacitat d’agir siá refortida e que nòstra region pòsca experimentar de nòvas competéncias al servici de sos territòris e sos abitants”.
De son costat, lo principal partit autonomista breton, l’UDB, a insistit sul fach que çò necite es una reforma constitucionala per que “quin territòri qu’o desire pòsca accedir a una autonomia plena e completa”, çò es que tenga de competéncias legislativas.
[Poblejat dins www.jornalet.com]
Sem comentários:
Enviar um comentário