Lo jornal britanic ditz qu'Espanha se servís de las informacions falsas per justificar l’autoritarisme
Lo jornalista estatsunidenc Adam Gabbatt a escrich un article al jornal britanic The Guardian ont parla de l’efièch que Donald Trump, president dels Estats Units, a agut sus d’autres govèrns del Mond a l’ora de difondre d’informacions falsas, mai conegudas amb l’expression anglesa “fake news”. Segon lo jornalista, dempuèi que Trump prenguèt sas foncions s’es popularizat aquel tèrme per criticar las informacions desfavorablas. Mas despuèi que lo cap d’estat estatsunidenc popularizèt aquela paraula, lo tèrme “fake news” es emplegat per “de dirigents de païses del Mond entièr, mai que mai los responsables dels regims autoritaris”, çò ditz.
Adam Gabbatt enumèra sièis exemples de dirigents que, segon el, justifican “lors atrocitats e los abuses contra los dreches umans” en se basant sus de sospechadas informacions desfavorablas. Dins aquela lista, mençona lo president de Veneçuèla, Nicolás Maduro; lo president de Siria, Bashar Al Assad; lo govèrn de Birmania; los mejans estatals chineses coma l’agéncia d’informacions Xinhua; lo Ministèri dels Afars Estrangièrs rus; e lo cap de la diplomacia espanhòla, Alfonso Dastis.
A prepaus de Dastis, explica que, dins una entrevista de la BBC, ensagèt de capelar la violéncia policièra de l’1r d’octòbre passat en Catalonha e Aran en disent que los vidèos èran falses. “De centenats de personas foguèron nafradas en Catalonha en octòbre, quand la polícia espanhòla incendièt los burèus de vòte per evitar lo referendum sus l’independéncia de Catalonha. Los vidèos mostravan que la polícia aviá tustat las gents que volián votar”, çò escriu. E en seguida cita aquesta frasa del ministre espanhòl: “Disi pas que tot siá d’imatges falses, mas qualques unas si, e se n’es derivat fòrça informacions falsas”.
Spanish FM @AlfonsoDastisQ on Catalonia crisis: "There has been a lot of alternative facts and fake news" bbc.in/2xdK5n0 #Marr
[Poblejat dins www.jornalet.com]
Sem comentários:
Enviar um comentário