S’es constituit un collectiu per salvar e valorizar la riquesa environamentala, istorica e culturala, après l’espoliacion del musèu arqueologic local
S’es constituit a Montmaurin (Nebosan) un nòu collectiu per la preservacion del patrimòni e “sauvar e valorizar la riquessa environamentau, istorica e culturau”.
La naissença del collectiu seguís l’espoliacion que la patiguèt lo musèu arqueologic de la vila. Al començament de decembre los gendarmas ne vogèron per fòrça las doas salas davant las protèstas dels oposants. Oficialament, las autoritats volián portar las pèças dins un musèu nòu e public.
Dins aquel sens, lo collectiu, fondat lo 18 de decembre passat, “demanda que las pèças desviradas per l’estat francés sian tornadas dins un musèu comunau adobat, que l’idèa n’estèc votada peu Conselh Municipau de Montmaurin lo 24 de junh de 2016. Aqueste musèu, restaurat dab un còst rasonable, seriá menat per la comuna dab l’ajuda deus servicis de l’estat”.
Lo collectiu afirma qu’es determinat a “engatjar totas las accions adaptadas tant au près de la populacion com au près de las elegidas e deus elegits entà sauvar aqueste patrimòni”.
Lucha contra una carrièra
En mai d’aquò, lo collectiu tamben vòl luchar contra l’implantacion d’una carrièra “que haré càiger lo desvolopament e l’atractivitat deu territòri”.
Segon de fonts oficiosas, la voidança del musèu correspondriá a una repression estatala contra los qu’an menat una campanha de lucha contra un projècte de carrièra a Montmaurin. Aquel projècte, autorizat per la prefectura, damatjariá l’environament de las gòrjas de Sava, un endrech especial per sa natura e per l’istòria del país. Es aquí que se trobèt la Vènus dera Espuga, una figurina del paleolitic talhada en evòri de mamot, que s’expausa ara dins un musèu de París e que li dison en francés “Vénus de Lespugue”.
Per mai d’informacions:
Collectiu entà la preservacion deu patrimòni de Montmaurin
Tel: +33(0)5 61 88 17 18
Sem comentários:
Enviar um comentário