Google e Levi’s pòrtan las novèlas tecnologias als vestits

Tre la rintrada se poirà ja crompar la Jacquard Tag, çò es la vèsta intelligenta, per un prètz d’aperaquí 350 dolars

Après qualques annadas de trabalh, las societats Google e Levi’s an ben capitat de portar las novèlas tecnologias als vestits. Tre la rintrada, se poirà ja crompar la Jacquard Tag, çò es la vèsta intelligenta, per un prètz d’aperaquí 350 dolars.

 

Pensada mai que mai pels ciclistas, la vèsta permetrà de realizar aquelas foncions qiue se fan normalament amb lo telefòn intelligent, en tot desplaçar la man sus la marga esquèrra. Per tant, la vèsta presenta, sus sa marga esquèrra, una mena d’ecran tactil que permet de contrarotlar divèrsas foncions, e ten una aplicacion per los telefòns intelligents. Atal, en tot marchar se pòt contrarotlar lo volum de la musica escotada, demandar d’informacion sul transit, legir o escotar los messatges de tèxt o decidir de respondre a una telefonada.

 

La batariá se tròba dins la marga e se pòt tirar per èsser tornada cargar per un connector USB. A l’ora d’ara a una autonomia de dos jorns, mas an ja anonciat que dins l’avenir son autonomia serà pus longa.

 

 

[Poblejat dins www.jornalet.com]