Exigisson del Parlament Europèu que son burèu de Barcelona incorpore l’occitan

Lo president de l’eurocambra a demandat qu’aquel burèu incorpore l’espanhòl, en seguida d’una demanda d’un partit espanholista. L’ONG catalana Plataforma per la Llengua i respond en i exigissent tanben l’occitan, qu’es lenga oficiala

Fa una setmana, lo president del Parlament Europèu, Antonio Tajani, exigiguèt que lo burèu que lo ten l’eurocrambra a Barcelona incorporèsse l’espanhòl a la senhaletica, que fins ara èra solament en catalan. O fasiá en seguida d’una demanda del partit Union Progrès e Democracia, de drecha espanholista. En contrapartida, l’ONG catalana Plataforma per la Llengua a mandat una letra a Tajani, en tot demandar que lo burèu en question emplegue tanben la lenga occitana dins sa senhaletica e dins sas comunicacions per que “se garentisca l’egalitat dels dreches de totes los grops lingüistics en Catalonha”. En mai d’aquò, Plataforma per la Llengua exigís tanben que lo burèu que lo ten la cambra europèa a Madrid incorpore tanben lo catalan, lo galèc e lo basco perque representa tot lo territòri estatal.

 

L’organizacion que trabalha per l’usatge social del catalan a tanben demandat que lo catalan e l’occitan se pòscan far servir al Parlament Europèu e, demest d’autras causas, coma lengas de traduccion dels tractats e dels tèxtes fondamentals de l’Union, e que las lengas del país sián presentas dins los programas d’aprendissatge de lengas que los promòu l’Union Europèa. Totun, reconeisson que se tracta de mesuras provisòrias fins que lo catalan obtenga un estatut d’oficialitat plena dins l’UE. 

[Imatge: www.europarl.europa.eu/barcelona - poblejat dins www.jornalet.com]