La porcelana de Lemòtges obten lo labèl “Indicacion Geografica Protegida”

Ara, los fabricants lemosins auràn los espleches juridics per far condemnar la concurréncia desleiala

La porcelana de Lemòtges obten lo labèl “Indicacion Geografica Protegida” (IGP), que sos critèris impausan una fabricacion e una decoracion dins la capitala lemosina o dins lo departament de la Nauta Vinhana (çò es lo País de la Vinhana, la Bassa Marcha e una partida de la Montanha Lemosina). Lo labèl serà oficializat lo 1r de decembre que ven e puèi serà publicat dins lo bulletin de l’Institut estatal de la Proprietat Intellectuala (INPI segon sa sigla en francés).
 
Los professionals de la porcelana de Lemòtges se regaudisson de la nòva, mai que mai car s’agís d’una profession ont coabitan istoricament de petits artisans de luxe e de grandas societats internacionalas. En mai d’aquò, lo president de l’Union dels Fabricants de Porcelana de Lemòtges (UFPL), Ailain Mouly, precisa: “ Non nonmàs protegissèm los emplecs que dependon de la filiera, mas tanben fasèm venir un buf noveu”, çò rapòrta 20 Minutes.
 
A calgut 4 ans per que los 47 membres de l’associacion apelada “Indicacion geografica Porcelana de Lemòtges” arriben a un consens. Per los promotors de l’IGP se tracta de protegir lo consumaire que poirà pas pus èsser abusat per d’estampilhas amb de noms similars (quitament “Limoge” sens “s”). Ara, los fabricants auràn los espleches juridics per far condemnar la concurréncia desleiala.

[Imatge: Frédérique Voisin-Demery - poblejat dins www.jornalet.com]