De representants de las lengas minorizadas de França al Parlament Europèu

Foguèron entenduts lo 16 de novembre passat a l’Intergrop de las Minoritats e de las Nacions Tradicionalas, que fonciona al sen del Parlament Europèu a Estrasborg

Un grop de cinc representants de lengas territorialas minorizadas de l’estat francés foguèron entenduts lo 16 de novembre passat a l’Intergrop de las Minoritats e de las Nacions Tradicionalas, que fonciona al sen del Parlament Europèu a Estrasborg (Alsàcia). L’iniciativa la menèt a bon tèrme l’eurodeputada basca Izaskun Bilbao amb la collaboracion de l’executiu regional del Partit Nacionalista Basco (EAJ) al Bascoat Nòrd.

L’occitan i èra representat per Gèli Grande, copresident del Partit de la Nacion Occitana (PNO), qu’èra acompanhat per de representants de las lengas basca, alsaciana, catalana e bretona. “Sèm estats contents de veire que se l’estat francés nos escota pas, almens Euròpa nos daissa parlar", çò declarèt Grande après son intervencion.

Los intervenents denoncièron la situacion de las lengas en França, qu’an de dificultats grèvas a manténer lor nombre de locutors e d’espacis per lor utilizacion. “Lor regèt de l’educacion publica a prepaus del modèl immersiu, lor regèt de l’administracion e dels mèdias e las dificultats legalas que s’opausan a lor promocion son de problèmas que son comuns a totes”, çò expliquèron.

Una lei europèa per protegir las lengas

L’eveniment foguèt l’ocasion per l’EAJ de presentar la revendicacion d’una lei europèa que siá constrenhenta per totes los estats membres e protegisca juridicament las lengas territorialas minorizadas de França contra lo monolingüisme francofòn. Dins aquel sens, Pako Arizmendi, president de l’executiu regional de l’EAJ al Bascoat Nòrd, demandèt als eurodeputats que lo president francés, Emmanuel Macron, compliguèsse sas promessas e cambièsse radicalament l’actitud de França envèrs la diversitat lingüistica. “Aquel cambiament seriá coerent amb lo Tractat de Lisbona e la question dels locutors de lengas minorizadas al nivèl dels Dreches Fondamentals”, çò precisèt Arizmendi.

Per qu’aquela proposicion siá discutida al Parlament europèu, cal obténer la signatura d’almens un milion de ciutadans de l’Union Europèa. 

 

[Imatge: Lo Lugarn - poblejat dins www.jornalet.com]