Bretanha: lo patron d’Ubisoft aficha son sosten a la Republica Catalana

Christian Guillemot a cambiat lo drapèl breton de son ostal per l’Estelada, dempuèi lo referendum del 1r d’octòbre passat

Dempuèi lo 1r d’octòbre passat, un
drapèl independentista catalan
bandeja en plaça del drapèl breton,
a l’ostal del patron d’Ubisoft 
© Google Street View

Es un secret de catòrze: Christian Guillemot un dels patrons (amb ses fraires) del vicelidèr mondial dels jòcs vidèo Ubisoft es un partisan acarnassit de Bretanha. Mas aquel patron sap tanben mostrar sas posicions al nivèl internacional. A Maltrë/Malastred (Bretanha), davant son ostal bandeja de costuma un grand drapèl breton. Mas dempuèi lo referendum en Catalonha e Aran es un autre drapèl que i bandeja: l’Estelada. E dins lo país, lo mond sabon ben qu’es un biais de mostrar clarament a totes son sosten a la Republica de Catalonha e Aran.

 

FL

Dins lo mitan patronal breton, Christian Guillemot es pas lo sol a prene posicion per Bretanha e per una evolucion de son estatut. D’autres grands patrons sostenon de mai en mai obèrtament e francament l’idèa d’una Bretanha independenta. E dempuèi lo movement dels Bonets Roges d’autres sectors socials seguisson lo meteis camin.

 

 

 

 

Fabien Lécuyer

[poblejat dins www.jornalet.com]