An presentat lo Vocabulari Basic der aranés

Es lo resultat del trabalh dels volontaris long de l’an 2017 e compta 2500 intradas. La version escolara serà publicada dins dos ans amb mai de 10 000 intradas

Lo 17 de novembre passat, l’Institut d’Estudis Araneses - Acadèmia Aranesa de la Lenga Occitana (IEA-AALO) presentèt lo borrolhon de son Vocabulari Basic der aranés, totjorn provisòri. La presentacion la faguèt als volontaris que i an contribuit. L’òbra serà publicada a la fin d’ongan, mas se contunharà de i trabalhar per tal que dins dos ans devenga lo Diccionari Escolar der aranés.

 

Lo Vocabulari Basic der aranés es lo resultat del trabalh dels volontaris long de l’an 2017 e compta 2500 intradas en tot incorporar los mots e las locucions de la lenga occitana mai emplegadas en Aran. La version escolara es previst qu’incorpòre mai de 10 000 intradas.

 

Lo diccionari respond a las demandas de las escòlas del país e del Conselh General d’Aran. Sa basa se tròba dins lo còrpus de las intradas de la Wikipèdia occitana e dins lo diccionari de Joan Coromines. Los autors de las contribucions son: Antoni Nogues, Anna Sala, Carmen Roy, Eduardo Orduña, Ingrid Jaquet, Jusèp Castet, Lourdes Santacruz, Lucia Mas, Lluisa Reig, Marçal Girbau, María Cuny, Ma. José Estévez, Ma. José Saurina, Maria Roy, Paloma Puche, Pilar Barés e Jusèp Loís Sans.

 

[Poblejat dins www.jornalet.com]