Los djudios de Sicilia

Por Yehuda Hatsvi 

Sicilia es la mas grande izla en la mar Mediterranea i a kavza de su pozision estratejika, en medio da la mar, eya fue konkistada varias vezes durante la istoria. En realidad Sicilia nunka fue un estado independiente. 

Unos 3000 anyos atras eya fue konkistada por los fenisianos. 200 anyos despues Sicilia devino una kolonia grega i es en esta izla ke, 2300 anyos atras, nasio el famozo sientista Archimedes. 

En el anyo 241 de muestra era, la izla fue konkistada por los romanos i kaji destruida kompletamente. Ma en el anyo 535, despues de la divizion del Imperio Romano, Sicilia paso a manos del Imperio Bizantino. Empesando del 652 la izla sufrio de atakos de trivos arabos, asta ke, en el anyo 965, la izla paso a ser en un emirato islamiko. 

Los Normandes, trivo del Norte de Evropa, konkistaron a Sicilia en el siglo 11. Durante sus dominio, eyos enkorajaron la imigrasion de la povlasion katolika a la izla, ma de otra parte no uvo atakos kontra los ortodokses, los djudios o los muslumanos. En 1282 el poder de la izla paso a manos de Pedro III, rey de Aragon.

Aun ke ya es sierto ke djudios bivieron en Sicilia, a lo menos desdel exilo del anyo 70, tenemos muy poka dokumentasion sovre la primera epoka (ke reelmente es la mas larga). Dunke trataremos, mas partikularmente, de la vida de los djudios sisilianos basho el rejimen espanyol. 

En akeya epoka, los djudios eran rekonosidos komo "vasales" del rey o de siertos barones ke posedavan grandes areas de la izla. Ofisialmente, el vasal, no era un sivdadino, ma avia una relasion entre el vasal i su senyor, a traves la kuala, el vasal era ovligado de pagar siertos dasios, al rey o al baron, a kambio de sus proteksion i permiso de bivir en sus teritorio. 

Los reyes de Aragon se bazavan sovre las "kartas de derechos" firmadas por los governadores anteriores, ma tambien munchas vezes akordavan privilejios a djudios ke eran medikos o ke tenian otros ofisios. Savemos, por exemplo, por los miembros de la famiya Sela, de la sivdad Trapani, ke durante 100 anyos dieron al rey varios servisios, ke eran liberados de pagar dasios, i indemas les era permetido de yevar armas i de fraguar un kal en el interior de sus kaza.

Es kuriozo ke no topamos en Sicilia nombres de ilustres rabinos o sientistas djudios. Uvo medikos, komersantes i tambien tradjumanes (traduktores), ma lo mas de entre eyos eran artezanos komo fierreros, kondurieros (sapateros), boyadjis (tinteros), i otros ofisios de lavoro manual. 

El haham mas sovresaliente en Sicilia era rabi Mazliah ben Eliya ben Albasek. El bivio en Palermo basho el dominio muslumano, eskrivio un perush (komentario) a la Mishna i era konsiderado komo una autoridad relijioza en toda la komunidad djudia de la izla. Ay de notar ke rabi Mazliah fue un elevo de rabi Hay Gaon (939-1038), en Babilonia. 

Las moradas de la mayoria de los djudios eran muy modestas. A vezes una sola kamareta para una famiya. A la eksepsion de los rikos, las kondisiones de morada eran bastante estrechas. Las kazas eran de un etaj, pokas eran las ke tenian dos o tres etajes. Las kuzinas i los kurtijos eran kondjuntos para mas de una famiya. La mayoria de las kazas eran alkiladas. Normalmente los djudios no mantenian una propriedad direkta de la tierra. Los patrones eran, jeneralmente, iglesias, konventos, kristianos rikos etc. 

No avia sovre los djudios restriksiones de rezidensia. Avia kayes i kuartieres en los kualos moravan djudios djuntos kon kristianos, i no se konsentia un antisemitismo kontra eyos (aun ke la iglesia se esforsava a dezazer estas buenas relasiones entre djudios i kristianos). Ma tambien avia kuartieres en los kualos bivian solamente djudios, para los ke preferavan morar en un ambiente djudio. Los rikos ke tenian la posibilidad ekonomika, a vezes, merkavan kazas afuera de la sivdad, serka de sus vinyas o kampos agrikolos. 

De mizmo ke kualkier otro lugar en el mundo, en Sicilia tambien la vida de los djudios era konsentrada al deredor de la keila. Malgrado la ley kanonika de la iglezia, predominante en toda la Evropa i ke no permetia fraguar muevas sinagogas, los Reyes de Aragon en Sicilia inyoravan esta regla. En las grandes sivdades fueron fraguadas o renovadas sinagogas, i tambien avia yeshivot ke la mas grande de eyas era el Bet Midrash, en Palermo. 

No savemos mucho sovre el rito de las orasiones entre los djudios de Sicilia, indemas siendo ke a esta izla vinieron djudios de varios paizes. 

Kuando los desendientes de los sisilianos vinieron (despues del anyo 1492) a bivir en el espasio del Imperio Otomano, eyos se mesklaron durante las jenerasiones, kon los sefaradim, ke eran la mayoria de la komunidad judia. 

De los uzos i kostumbres de los judios de Sicilia, mos kedo ayinda, asta oy en dia, el "Purim de los Saragostis*". Este Purim espesial se fiesta en la sivdad de Siracusa, i entre desendientes de esta sivdad, en el 18 del mez Shevat. 

Es kuriozo, ke afilu despues del anyo 1478, kuando se establesyo en Espanya la Inkizision, autorizada por los Reyes Katolikos, su prezensia no fue konsentida del todo en Sicilia. 

Dunke, los djudios de Sicilia gozaron de una sierta libertad de relijion, i este fato les permetio de mantener un sistema de djuisio, kaji independiente, bazado sovre la relijion djudia. Naturalmente, en siertos kavzos avian kontradiksiones entre el verdikto del Bet Din djudio i el tribunal del reynado. Entonses no avia otro remedio sino ke de akseptar el reglamiento ke akompanyo a los djudios durante la istoria: "dina de malhuta dina", kere dizir ke se deve akseptar la ley del reynado. 

La mayoria de la informasion ke tenemos sovre los kales i yeshivot es bazada sovre dokumentos notariales komo testamentos i mas. Frekuentamente se apartava una suma de dinero para sedaka, para alguna yeshiva i para "azete al kal". "Echar azete al kal" era, asta pokas dekadas atras, una kustumbre bien uzada al seno de los sefaradis. 

De los testimonios savemos tambien en ke mizura kudyavan los padres para la edukasion de sus ijos: despues de aver deshado los bienes a nombre de la mujer (o en kavzo ke la mujer muria antes, a nombre del marido), se apartava tambien una suma espesiala para la edukasion de los ijos ke kedavan guerfanos. 

Jeneralmente los ijos de los rikos estudiavan kon maestros privados, ma avia tambien eskolas publikas, ke apartenian a la komunidad, ansi ke eskolas privadas. En todas las eskolas primarias djudias se ensenyava el ebreo i tambien la lengua lokala. Pokos fueron los ke reusheron en estudios de institusiones de mas alto grado, ma de toda manera, muy raramente se enkontrava, en la Edad Media, un djudio ke era analfabeto. 

En komparasion kon otros paizes, la vida de los djudios en Sicilia era simple i kalma. Afilu en los trokamientos de rejimen, komo por exemplo, kuando pasaron del dominio musulmano al poder del rey de Aragon, no uvo una fuyida masiva de djudios de la izla. Al kontrario, durante todas las epokas existio una imigrasion a Sicilia, moderada ma konstante, de djudios de Catalunia i de otras partes de Espanya, de Afrika del Norte i afilu de los Balkanes. Aun kon esto seria difisil de desidir el orijin de los djudios de Sicilia porke las alkunyas, de raiz araba, de los ke vinieron de la peninsula Iberika eran muy semejantes a las alkunyas de los sisilianos veteranos. De la otra parte, tambien eran komunes nombres ke indikan ke son de orijin norte-afrikana, siendo ke, por varios motivos, djudios de Espanya pasavan a bivir a paizes en Afrika del Norte, por dos o tres jenerasiones i a vezes mas ke esto. Puedemos dizir ke Sicilia era un krisol en el kual se mesklaron djudios de munchos paizes, de Evropa i de Afrika tambien. 

En el mez de Marso 1492, los Reyes Katolikos, Fernando i Isabel, firmaron el Dekreto de Ekspulsion de los djudios de Espanya ke inkluiya a Sicilia i otros teritorios basho el dominio espanyol. En akeya epoka los djudios de Sicilia kontavan mas de 25000 almas, ke eran un 5% de la povlasion de la izla. Kon el Dekreto de Ekspulsion unos 20% desidieron de konvertirsen al kristianizmo para no despartirsen del paiz onde nasieron. Malorozamente, eyos no se imajinavan ke tendrian una vida muy amarga, devido a las persekusiones de la Inkizision. 

En realidad, el Dekreto de Ekspulsion vino a kompletar un proseso ke su buto era una evakuasion etnika de todos los djudios de Evropa. Este proseso ya avia empesado kon la ekspulsion de los djudios de Ingletierra en el siglo 13. Kon la ekspulsion de los djudios de Sicilia i otros teritorios espanyoles se termino tambien una epoka de 1000 anyos de una ko-existensia djudia-kristiana. El exilo de los djudios kavzo grande danyo a la ekonomia de Sicilia, komo tambien a la ekonomia de Espanya, ma esto no mos konforta.

*El Purim de los Saragostis, ke algunos atribuyen tambien a los djudios de Zaragoza en Espanya, selebra la salvasion de los djudios de dicha komunidad de una grave akuzasion, echa por un malsin: de kitar a la prosesion ke se uzava azer en onor al rey, las kashas de Sifre Tora, ma sin los Sifre Tora adientro. Para ver si esto era exakto, i en este kavzo kastigar a los responsables, el rey ordeno de asperar a la proksima prosesion, i entonses avrir las kashas de los sifre Tora ke eran kitadas afuera. Por suerte, la noche antes de la prosesion, el shamash del kal tuvo un suenyo, en el kual el profeta Eliyau le dizia ke devia tornar i meter los Sifre Tora adientro de las kashas, lo ke se apresuro de azer. Kuando, el dia de la prosesion, el rey ordeno de avrir las kashas afin de ver si la akuzasion era verdadera o no, a la sorpreza del malsin, todos pudieron ver ke los Sifre Tora estavan en sus lugar i los djudios salvaron de la triste suerte ke los asperava, si salia ke las kashas estavan vazias.

[Orijen: www.aki-yerushalayim.co.il]