Dins tot lo territòri an agut luòc d’acamps de protèsta contra l’encarceracion dels presidents de las doas associacions independendistas acusats de “sedicion”
Son en preson, dempuèi dimars de ser, los presidents de las doas associacions independentistas, acusats de “sedicion” per aver cridat a manifestar pacificament. Mas la decision de la jutgessa a provocat de reaccions nombrosas, en Catalonha e Aran, e endacòm mai, e son de soslinhar los acamps de protèsta que se visquèron per tot lo país.
A miègjorn i aguèt d’acamps de protèsta davant los luòcs de trabalh de cadun, e tanben davant las comunas. De ser, a partir de 20h, de centenats de milièrs de personas s’acampèron en silenci amb de candelas a las principalas vilas de Catalonha. En Aran, l’acamp se tenguèt davant lo sèti del Govèrn d’Aran a Vielha ont se legiguèt una declaracion contra la supression dels dreches fondamentals.
Mai de repression
Mentretant, la Gàrdia Civila intrèt dins lo sit del servici del telefòn d’emergéncia de Catalonha per contrarotlar las comunicacions de la polícia de la Generalitat, los Mòssis d’Esquadra, e per cercar d’enregistraments sus la jornada del 1r d’octòbre.
“Ajudatz a Catalonha, salvatz Euròpa”
Mentretant, Òmnium Cultural a publicat un vidèo en anglés, amb de jostítols en catalan, que vòl far una crida al Mond. Entitolat “Ajudatz a Catalonha, salvatz Euròpa”, lo filmet explica e mòstra d’imatges de la lucha pacifica del pòble per l’independéncia e denóncia l’autoritarisme e la repression de l’estat espanhòl.
Lo cortmetratge se conclutz amb un messatge als ciutadans d’Euròpa. “Sèm de ciutadans europèus coma tu e avèm de besonh de ton ajuda per defendre la libertat e la democracia. Te prègui de clucar pas los uèlhs. Çò que se passa aicí, en Catalonha, es pas un afar intèrn espanhòl. Pertòca totes los ciutadans europèus. Ara, abans que siá tròp tard, ajuda a Catalonha, salva Euròpa”.
Tens of thousands protest in the streets of #Barcelona and other Catalan cities after the arrest of two leaders of the civilian independentist movement. #LlibertatJordis #Catalonia
[Poblejat dins www.jornalet.com]
Sem comentários:
Enviar um comentário