Lo sit es ara proprietat de la familha del dictator e gerit per una associacion espanhòla que sa tòca es de propagar un imatge positu de la personalitat de Franco e de las “reüssidas” de son regim
De militants de partits e sindicats nacionalistas galècs ocupèron dimècres passat lo palais de Meirás, la residéncia d’estiu de Francisco Franco, qu’es totjorn proprietat de la familha del dictator. Amb aquela accion an revendicat que lo sit siá tornat a l’administracion publica. Sus lors bandeiròlas se podiá legir: “Lo palais pel pòble galèc. Franquisme jamai pus” e “Que nos tornen çò que nos an panat”. Puèi, la Gàrdia Civila deslotgèt los manifestants e prenguèt lors identitats.
Fa gaire, la familha Franco autregèt l’amainatjament del palais a la Fondacion Francisco Franco, una associacion espanhòla que sa tòca es de propagar un imatge positiu de la personalitat del dictator e de las “reüssidas” de son regim. Las subvencions que recep de l’estat espanhòl descadenan sovent de protèstas.
La Fondacion Francisco Franco explicava que lor gestion del palais èra “una escasença per mostrar al grand public la grandor de la figura de Francisco Franco”.
Lo palais de Meirás èra proprietat de la familha Pardo Bazán, e es justament aquí que nasquèt en 1851 l’escrivana feminista Emilia Pardo Bazán. Mas en 1938 las autoritats franquistas donèron lo palais al dictator per que i establiguèsse sa residéncia d’estiu.
[Poblejat dins www.jornalet.com]
Sem comentários:
Enviar um comentário