Val d’Aran: reclaman que las institucions del país occitan s’engatgen pel referendum del 1r d’octòbre

Plusors personalitats aranesas signan lo “Manifèst de Les” a prepaus del referendum d’independéncia. Lo presentaràn publicament lo 30 d’agost

Divèrsas personalitats de la Val d’Aran an demandat que las institucions aranesas s’engatgen mai pel referendum d’independéncia del 1r d’octòbre venent. De soslinhar entre eles la deputada Mireia Boya, lo cònsol màger de Les Emílio Medan, l’èx-cònsol de Vielha Àlex Moga, l’èx-cònsol de Salardú Jaume Geli, e de membres d’Esquèrra Republicana e de Podèm.

Diluns passat, s’amassèron pel primièr còp a Les (Quate Lòcs) e redigiguèron lo manifèst que podètz legir çai jos. Reclaman a las institucions d’Aran que s’engatgen pel referendum, e als elegits e representants de Catalonha qu’escoten e accèpten las decisions dels araneses. En mai d’aquò, recòrdan qu’Aran es un subjècte politic reconegut per la lei, saludan lo procès catalan e lo drech de totes los pòbles del Mond de decidir lor avenidor, e planhon la manca de volontat politica de las institucions espanhòlas.

Lo 30 d’agost que ven, faràn una sesilha informativa sul referendum e presentaràn lo manifèst al public.

A l’ora d’ara, Convergéncia Democratica Aranesa a pas definit publicament sa posicion sul referendum. De son costat, Unitat d’Aran, partit sòci del partit socialista espanhòl PSÒE, a anonciat que ni metrà las urnas ni mai daissarà los locals de las comunas que govèrna per que se realize lo vòte.

 

fffff		fffff
	En tot èster auè, 14 d’agost de 2017 amassats militants e simpatitzants de : CDA (Convergéncia Democratica Aranesa), Unitat d’Aran, ERC, CUP, Podem, en pòble de Les, es presents acòrden per unanimitat hèr públic eth següent manifest: MANIFÈST DE LES Aran ei un subjècte polític qu’a reconeishut per Lei eth dret a decidir (Disposicion Addicionau Prumèra dera Lei 1/2015, de 5 de hereuèr, deth regime especiau d’Aran). Reconeishem e defensam no sonque eth nòste dret a decidir, senon tanben eth de toti es pòbles deth mon que le volguen exercir. Observam damb preocupacion eth conflicte institucionau daurit arran dera convocatòria d’un referendum pera independéncia de Catalonha eth pròplèu 1 d’octobre de 2017. Consideram que sonque exercint eth dret a vòt des ciutadans se pòt solucionar un conflicte d’aguesta naturalesa. Lamentam era manca de volentat politica deth govèrn espanhòu entà facilitar era celebracion d’un referendum en març dera legalitat espanhòla. Celebram era determinacion deth govèrn dera Generalitat d’impulsar ua naua legalitat entà hèr possible era votacion deth pròplèu 1 d’octobre. Coma aranesi, mos sentim concernits políticamente en procès d’autodeterminacion deth pòble catalan. Demanam damb tota fermetat as nòsti Alcaldes e representants Institucionaus d’Aran que daurisquen damb normalitat es colegis electoraus er 1 d’octobre entà permeté-mos, coma ciutadans de Catalonha, expresar librement eth nòste parèr sus eth futur de Catalonha. Demanam as polítics e representants institucionaus de Catalonha que escoten damb valentia eth prononciament que hèsquen es aranesi e sapien aceptar es conseqüéncies que se’n deriven. Convocam a toti es ciutadans/es d’Aran a ua session informativa sus eth Referéndum de Catalonha, qu’aurà lòc eth dia 30 d’agost en lòc e ora a determinar. Signen eth present manifest: Emili Medan Jaume Geli Rafa Sanmartí Àlex Moga Paco Faure Mireia Boya Hug De la Rosa Julian Fernández Rafael Ferran Joan Algadò

[Poblejat dins www.jornalet.com]