Primeros enkontros internasionales sovre el djudeo-espanyol

Un paso de muy grande importansia para el futuro de la lengua djudeo-espanyola fue echo en los Primeros Enkontros Internasionales sovre el Djudeo-espanyol ke tuvieron lugar en Tel Aviv, basho los auspisios del V Prezidente de Israel el sr Yitshak Navon, el 4-5 Avril 1994.

Konvokados sovre la inisiativa de Morit (Erensia de los Djudios de Turkia) i Sefarad -- la Asosiasion para la Konservasion i Difuzion de la Kultura Djudeo-espanyola, ansi ke otras asosiasiones i organizasiones sefaradis, estos enkontros permetieron de reunir a los prinsipales faktores en el mundo -- investigadores, jurnalistas i eskritores ansi ke reprezentantes de asosiasiones -- ke estan luchando para empidir la desparision de la lengua djudeo-espanyola i de toda la kultura ke es atada a esta lengua.

El primer buto era de onorar a estos faktores* i enkorajarlos a kontinuar i mizmo intensifikar sus aktividad en este kampo. El sigundo buto, aun mas importante por los rezultados ke esperamos ke tendra, fue de tratar endjuntos de lo ke es echo i sovre todo de lo ke deve ser echo, afin de asigurar el futuro de esta lengua i de la kreasion kontemporanea en djudeo-espanyol en el kampo literario i jurnalistiko tambien.

La intension no era de tener un kongreso kon konferensias akademikas sovre los diversos aspektos de la lengua sino ke un enkontro entre los ke son interesados en la kontinuasion del djudeo-espanyol komo lengua biva i ke estan prontos a azer los esforsos nesesarios para esto. Los partisipantes, espartidos en 6 seksiones diversas sigun sus kampo de aktividad (Lengua, Prensa eskrita, Radio, Folklor, Kreasion literaria kontemporanea i Teatro) tuvieron la posibilidad de ekspozar sus opiniones sovre lo ke deve ser echo afin de anchear sus aktividades i lograr mijores rezultados. Un debate mas seriozo sovre esta kestion tuvo lugar a la fin del dia, en el kuadro de una meza redonda sovre el futuro del djudeo-espanyol.

Fue este un dia de debates muy intensos, sin intervalos entre una sesion i la otra i kon apenas 45 minutos entre las sesiones de la manyana, de despues de medio dia i de la tadre, afin ke la djente pueda tomar un kafe o komer algo. Aun kon esto, el ancho auditorio de Bet Atefutsot estuvo kaje kompletamente yeno durante todas las oras del dia, kon un publiko atentivo i kalorozo en sus reaksiones a lo ke fue dicho en las sesiones de lavoro. Su entuziazmo yego al kolmo kuando, a la fin del debate en la meza redonda kon la kuala se termino el dia, fue desidido de fondar una Union Mundiala del Djudeo-espanyol ke ovrara para la koordinasion de las aktividades en este kampo, en las diversas partes del mundo, bushkara a inisiar muevos proyektos i sovre todo a asigurar una buena baza finansiaria ke permeta de adelantar en este kampo, a un ritmo muncho mas apresurado ke el de agora. En el grande auditorio del Muzeo Erets Israel tuvo lugar a la tadre del dia de despues, la seremonia en la kuala las institusiones aktivas en el kampo del djudeo-espanyol resivieron plakas de rekonosimiento i apresiasion por sus esforsos en este kampo. Onoraron esta seremonia kon sus prezensia el Sr Navon, ke dio sus auspisios a los enkontros, los embasadores de Espanya, Turkia i Venezuela, los reprezentantes de las asosiasiones de djudios de los paizes diversos onde se avlava i se avla ainda el djudeo-espanyol i enfin un numerozo publiko ke inchia el auditorio de una pared a la otra.

Despues de las palavras de bienvenida del Prezidente de Onor de los enkontros, el sr Moshe Katan, i del deskorso de aviertura del sr Yitshak Navon, fu entregada una plaka de rekonosimiento al embasador de Turkia, suksesora del Imperio Otomano ke dio abrigo a los sefaradis i les permetio de mantener sus lengua i kultura asta muestros dias. Tambien fueron dadas plakas de rekonosimiento a los Departamentos de Sensia i Kultura en los Ministerios de Relasiones Eksteriores de Israel i de Espanya por sus apoyo a los esforsos ke son echos agora para no deshar pedrer esta kultura.

La larga fila de reprezentantes de institusiones diversas ke suvieron despues a la shena para resivir sus plakas de apresiasion de manos del sr Navon, es una indikasion del muy importante lavoro ke esta siendo echo aktualmente, en diversas partes del mundo, en el kampo de la kreasion literaria i jurnalistika en djudeo-espanyol ansi ke de su ensenyansa i investigasion.

Este aspekto fue tambien ilustrado en el audio-vizual ke fue prezentado sovre la istoria de la prensa djudeo-espanyola, ansi ke en un sketch umoristiko en djudeo-espanyol i el konserto de kantes djudeo-espanyoles por el grupo La Boz de Sefarad ke termino esta memorable nochada. 

Dos kozas meresen ser apuntadas en konkluzion a estos Enkontros sovre el Djudeo-espanyol, los primeros a aver sido organizados no por faktores akademikos o governamentales, en el kuadro de kongresos o kolokios diversos, sino ke por los sefaradis eyos mizmos, a traves de sus asosiasiones.

La primera es el entuziazmo kon el kual el publiko reaksiono a todo el programa de los enkontros, el intereso kon el kual eskucho los debates i la alegria kon la kuala resivio el sketch i los kantes del programa artistiko - sinyos todos de la sed ke se konsiente para tales aktividades. Los enkontros sovresalieron tambien por la atmosfera kordiala i amistoza ke fue konsentida todo el tiempo ansi ke, a nivel personal, por las buenas relasiones de amistad ke se krearon entre todos los partisipantes. 

La sigunda koza es ke estos enkontros no fueron de "avlistinas" solamente sino ke se terminaron kon una muy importante rezolusion adoptada a la unanimidad: de fondar una Union Mundiala del Djudeo-espanyol afin de bushkar a aunar todos los faktores ke luchan por el futuro de esta lengua i su kultura en el grande esforso komun ke deve ser echo afin de no deshar ke eyas se depiedran enteramente. La kreasion de esta Union ya es un grande paso adelantre i ya se empeso a aprontar un programa de lavoro ke permetera de alkansar gradualmente los butos ke mos fiksimos. Kale apuntar, djuntos kon esto, ke la reushidad de este esforso depende tambien de la mizura en la kuala kada uno de mozotros se konsiderara personalmente resposable por el futuro de esta erensia kulturala, transmetida de una jenerasion a la otra durante 5 siglos i ke agora kaye a muestra jenerasion de pasar a la de muestros ijos.

Rezolusiones de los primeros encontros internasionales sovre el djudeo-espanyol

Al konkluirsen los Primeros Enkontros Internasionales sovre el Djudeo-espanyol, ke tuvieron lugar en Tel Aviv el 4-5 Avril 1994, fue desidido a la unanimidad: De konvokar regolarmente estos enkontros kada dos anyos. De fondar la Union Mundiala del Djudeo-espanyol ke ovrara para una mijor koordinasion entre todas estas institusiones i para la promosion de proyektos ke ayudaran a la ensenyansa del djudeo-espanyol i su literatura, ansi ke al dezvelopamiento de todos los otros aspektos de la kultura djudeo-espanyola. De formar un komite exekutivo temporario afin de azer los pasos de los kualos ay menester para la aplikasion de estas rezolusiones De publikar periodikamente edisiones ancheadas i aktualizadas del katalogo de las institusiones ke se dedikan a la konservasion i promosion de la lengua djudeo-espanyola i de su kultura. Felisitasiones del Ministerio espanyol de Relasiones Eksteriores

Con motivo de los "Primeros Encuentros Internacionales sobre el Judeo-espanyol" organizados por la Asociacion Morit (Herencia de los Judios de Turquia), con la colaboracion de la Asociacion Sefarad para la preservacion y difusion de la cultura judeo-española y celebrados bajo los auspicios del V Presidente de Israel, Excmo. Sr. D. Itshak Navon, les hago llegar mi mas calurosa felicitacion. 

La celebracion de estos encuentros, los primeros que se celebran con caracter internacional sobre el judeo-español, con la participacion de diversas instituciones que desde la educación, la creacion literaria y los medios de comunicación se esfuerzan por la preservación y difusión de la lengua judeo-española y su cultura, suponen una magnifica iniciativa. 

El Ministerio espanyol de Asuntos Exteriores y su Direccióon General de Relaciones Culturales les desean grandes exitos y esperan que durante estos Encuentros se adopten decisiones que contribuyan a la conservación y promoción de la lengua y del folclore judeo-espanyol, elemento fundamental del legado hispano-judío que es parte de la identidad cultural española.

Mesaje del Sr. Yehiel Leket 

Shefe Aktuante dela Direksion de la Adjensia Djudia para Israel

La kultura del puevlo de Israel es karakterizada por su fasinante reushidad a integrar sus manaderos ebreos kon las influensas ke resivio de los kontaktos kon las kulturas al seno de las kualas fueron aktivos los sentros de kultura djudios.

Una de las mas sovresalientes kreasiones de muestra tradision es la lengua djudeo-espanyola, kon su abondansia de kantes i de kuentos ke fueron kreados i transmetidos en esta lengua.

El puevlo djudio, en todos los paizes onde se topa, deve agradeser a los ke mantuvieron biva esta lengua, grasias a la kuala numerozas komunidades konservaron sus identidad i ke reprezenta tambien la ermoza karakteristika djudia de mantener la identidad kulturala del puevlo todo, en avriendose a otras kulturas.

Dezeo enkorajar a los partisipantes de estos enkontros a kontinuar en sus aktividad fruchiguoza, en Israel i en la Diaspora, i augurarles ke esta aktividad se anchee i se espanda ainda mas.

[Orijen: www.aki-yerushalayim.co.il]