sábado, 1 de julho de 2017

Las sinagogas medievalas de Espanya

Por Zelda Ovadia

Kuando se avla de sinagogas espanyolas en primer lugar mos vienen al tino las dos mas famozas i muy konosidas de entre eyas, ke yegaron asta muestros dias en un estado perfekto: estas son la sinagoga Del Transito i la sinagoga Santa Maria la Blanca, en Toledo. Ma siendo ke los djudios bivieron, desde largos siglos i asta sus ekspulsion, en todas las partes de Espanya es koza evidente ke avian sinagogas en munchas otras sivdades, sivdadikas i kazales de este paiz.

La Sinagoga de Cordova


Muy pokos son los restos ke kedaron de las antiguas “juderias” de las sivdades medievalas, restos ke estan dispersados kaji por toda Espanya. En desparte de la djuderia de Toledo, una de las mas importantes fue la de Cordova, sivdad natala de dos de las mas famozas figuras del djudaizmo Hasday Ibn Chiprut i el Ramba’m (Maimoides).

Es en  el sentro de este kuartier, muy serka de la famoza Mishkita-Katedrala de Cordova i de la Puerta Almodovar, en el numero 18 de la kaye Judios, yamada durante largos anyos kaye Maimonides, ke se topa la sinagoga de Cordova. Esta es una de las mas istorikas i atrayantes sinagogas del mundo i una de las mas sinyifikativas de Espanya. Eya fue fraguada en el estilo mudejar, basho la supervizion del maestro-konstruktor Ishaq Moheb. Su konstruksion duro un anyo: entre el mez de Septembre de 1314 al mez de Septembre de 1315,  i es una de las tres sinagogas ke kedaron en Espanya, kaje en sus estado orijinal, asta oy dia. 

La sinagoga no tiene un akseso direkto a la kaye i se entra a su interior a atraves de un patio i de un chiko vestibulo ke yeva a la sala de orasion. La galeria de las mujeres o sea la azara es konektada a la sala de orasion por una eskalera, i tiene tres balkones. La  sala de orasion es kaji kuadrada, 6.95 x 6.37 m. i su  altura es mas de 6 metros. Versikolos de la Tora, eskritos en ebreo, i motivos de plantas adornan las paredes de esta chika sinagoga. Los restos de la dekorasion  ke fueron konservados asta oy mos pueden dar una idea de la ermozura i rikeza ke eya tenia en sus dias de splendor.

Despues de la ekspulsion el kal fue transformado en ospital. Verso la fin del siglo 16 (1588) el edifisio fue konvertido en lugar santo para las misas de los sapateros.

En 1885 la sinagoga fue deklarada Monumento Nasional por su valor artistiko; fue restaurada varias vezes i en 1985, anyo en el kual fueron markados los 850 anyos del nasimiento del Ramba’m ke nasio en Cordova, eya fue avierta al publiko.  

La antigua Sinagoga Mayor de Barcelona


En el siglo 15 existian a lo menos sinko sinagogas en el kuartier djudio de Barcelona. El gran viajador sefaradi Binyamin de Tudela, pasando por esta sivdad en el siglo XI, avia notado en su diario ke existia ayi una santa komunidad de ombres savios i grandes en la Tora.

La Sinagoga Mayor, en el numero 7 de la aktual kaye de San Domenec del Call, es la mas antigua de las sinagogas de Espanya i puede ser ke de Evropa entera. Eya fue deskuvierta grasias al lavoro de investigasion del istoriador medievalista Jaume Riera y Sans ke en 1987 publiko el livro  “.... catalan y los Judios”. En 1995, Jaume Riera, djuntos kon miembros de la Associació Call de Barcelona desidieron de merkar el lugar, ke estava  en el punto de ser transformado en otrun bar, afin de rekuperar la memoria istorika del djudaizmo de Cataluña i salvar del olvido tanto el patrimonio djudio komo el katalan.

En segito a las persigisiones kontra los djudios en 1391, las funksiones de la sinagoga komo sentro de la vida djudia relijioza avian sido interrumpidas i el edifisio avia pasado a manos del rey. El fue alkilado  a la famiya D’Arguens, famiya de konversos ke transformaron una de las salas del kal en tintoreria. La sinagoga, a la kuala se abashava por un puerta ke se avria de la kaye, fue uzada muncho mas tadre, sin ke dinguna sepa su valor istorika, komo magazen para entrepozar materiales elektronikos.

En el siglo 17 las autoridades de la sivdad avian dado el permiso de fraguar otros kuatro etajes al edifisio, lo ke troko kompleltamente su struktura orijinal.

Bazandose sovre las investigasiones de Jaume Riera fue yegado a la konkluzion ke esta es la lokalidad de la Sinagoga Mayor de Barcelona, prinsipalmente por sus dos grandes ventanas, orientadas a Yerushalayim, ke simbolikamente deshavan entrar la luz de la sivdad santa. Este fakto enrezio mas la konvinksion de Riera ke se tratava de la Sinagoga Mayor del antiguo kuartier djudio de Barcelona. En ekskavasiones echas en el lugar fueron deskuviertas tambien las fondasiones de otra sinagoga ke mos yevan a la epoka del Imperio Romano. En efekto, en el anyo 212 de muestra era el Imperador Caracalla avia permetido la konstruksion de un kal para los djudios ke bivian ayi, lo ke prova ke uvo una prezensia djudia en Barcelona desde los primeros siglos de la Era Kristiana.

Despues de aver alimpiado i restaurado los restos de esta antigua sinagoga, i averla konsakrado kon una muy esmoviente seremonia de “Ahnasat Sefer Tora” (Introduksion de Sefer Tora) ke tuvo lugar  en el 22 de Enero 2006, eya fue avierta de muevo a los servisios relijiozos kon el nombre de Sinagoga Shlomo Ben Adret. Oy tienen lugar ayi seremonias de Bar Mitsva i Bat Mitsva, bodas i azkarot.

Aki devemos mensionar i agradeser muy partikularmente los esforsos ke fueron echos para la reushidad de este proyekto por la Dra. Ascuncion Blasco Martinez, profesora en la Universidad de Zaragoza i la Dra. Pilar Romeu Ferré, filologa. (Kreo ke la sinagoga fue merkada, puede ser por inisiativa de Riera, ma por Miguel Iaffa – ke mos izo una vijita giada en el lugar, kuando estuvi en Barcelona pokos anyos atras. Puedes ver si lo mensionan, en el artikolo sovre el kual te bazates?)

Gerona


Munchos de entre mozotros tienen vijitado en Gerona, sivdad vizina de Barcelona, i en el Museo de Historia  de los Judios, en el Centro Bonastruc ça Porta  situado en el sentro del Call, lo ke era el kuartier djudio de esta sivdad. Ma no munchos savemos ke el edifisio onde se topa el muzeo, fue fraguado sovre los restos de lo ke fue la ultima sinagoga de Gerona. Eya fue vendida en 1492, anyo de la ekspulsion, por la komunidad djudia a los saserdotes de la katedrala.

En este lugar, ke ainda konserva de una sierta manera la atmosfera de los tiempos medievales, estava la sinagoga, la sala de estudio i orasion i la azara, la galeria de mujeres. En este mizmo espasio se topavan tambien una eskola para chikos i grandes; el mikve para el banyo ritual, ansi ke un lugar espesial destinado a la shehita, degoyamiento de las bestias, por los rabinos, en konformidad kon las reglas de la ley djudia, para obtener karne kasher.

Desde su vendida, en 1492 i asta el siglo 20, el edifisio troko varias vezes de proprietarios, asta ke el anyo 1987 fue merkado por la Munisipalidad de Girona. Sovre la inisiativa de las autoridades el edifisio fue restaurado afin de poder rekuperar en el su istoria i su pasado kultural. En 1992 se kreo el Patronato Municipal Call de Girona, formado por el Ayutamiento y la Deputacion de Girona kon el apoyo de la Generalitat de Catalunya, el kual se okupa de la rekuperasion fizika i kultural del patrimonio djudio de Gerona.

En las salas de este muzeo, debasho del kual repozan los restos de la antigua sinagoga de Gerona, estan ekspozadas, entre otras, unas kuantas piedras tombalas ke fueron traidas de simeterios djudios de diversas partes de Espanya. 

El Muzeo de Istoria de los Judios, djunto kon el Sentro Bonastruc ca Porta i el Instituto de Estudios Nahmanides son oy faktores kulturales muy sinyifikativos i importantes para la sivdad de Gerona, ansi komo para la investigasion i rekuperasion del patrimonio djudio de Espanya.

Las sinagogas de Segovia


En el antiguo kuartier djudio de Segovia existian dos sinagogas: la Mayor, ke fue transformada en iglesia kon el nombre de Corpus Cristi, i la Menor, ke devino ospital kon el nombre de Nuestra Señora de las Mercedes. En los rejistros de administrasion ke sus prinsipio data del anyo 1389, es notado ke la Sinagoga Mayor de Segovia, ke fue konstruida en el siglo 12, kedo en manos de la komunidad djudia asta el mez de Septembre de 1410. En este mizmo anyo, kon el preteksto ke rabinos profanaron una seremonia katolika, la reyna Doña Catalina se apodero de la sinagoga Mayor i la ofresio al obispo D. Juan de Tordesillas.

La sinagoga fue merkada, en 1572, por Manuel del Sello i su ermano Antonio, i fue entregada en manos de relijiozas fransiskanas ke la transformaron en konvento.

En un fuego ke desbrocho, en 1899, esta djoya arkitekturala se transformo dientro muy kurto tiempo en ruinas. Los unikos restos de la sinagoga ke superaron el fuego fueron las dos paredes laterales orientadas del Norte al Sud i una puerta en una de estas paredes, ke a la vista sirivia a las mujeres para entrar a la azara. El edifisio fue restaurado i oy es konosido kon el nombre de la Iglesia de Corpus Christi de Segovia - Antigua sinagoga.

Lo ke esta singoga tenia de muy partikular, es su semejansa, del punto de vista arkitektural, a la sinagoga Santa Maria la Blanca, de Toledo.



[Orijen: www.aki-yerushalayim.co.il]

Nenhum comentário:

Postar um comentário