El Rey de Francia
Tres hijas tenia
La una lavrava
La otra cuzia
La mas chica de ellas
Bastidor hazia
Lavrando lavrando
Sueño le caia
Su madre que la via
Aharvar la queria
'No m'aharvex mi madre
Ni m'aharvariax
Un sueño me soñava
Bien y alegria'
'Sueño vos soñavax
Yo vo lo soltaria'
M'apari a la puerta
Vide la luna entera
M'apari a la ventana
Vide la estrella Diana
M'apari al pozo
Vide un pilar d'oro
Con tres paxaricos
Picando el oro
La luna entera
Es la tu suegra
La estrella Diana
Es la tu cuñada
Los tres paxaricos
Son tus cuñadicos
Y el pilar d'oro
El hijo del Rey,
Tu novio
Sem comentários:
Enviar um comentário