Sephatrad: Lo PP espanhòl exigís d’Estònia que s’exprimisca “fermament” contra la reconeissença d’una Catalonha independenta

domingo, 4 de junho de 2017

Lo PP espanhòl exigís d’Estònia que s’exprimisca “fermament” contra la reconeissença d’una Catalonha independenta

Estònia tendrà la presidéncia de l’UE a partir del 1r de julhet, e lo PP fa pression suls principals dirigents d’aquel país

Grop del Partit Popular Europèu

Lo Partit Popular (PP), que ten a l’ora d’ara lo govèrn de l’estat espanhòl, a exigit al govèrn d’Estònia que se manifèste “fermament” contra lo procès d’independéncia de Catalonha e Aran. Estònia prendrà la presidéncia de l’Union Europèa lo 1r de julhet que ven, e la setmana passada una delegacion de deputats e eurodeputats estonians se gandiguèt a Barcelona e rescontrèt lo president de la Generalitat, Carles Puigdemont.

Lo pòrtavotz del PP espanhòl, Esteban González Pons, qu’es tanben vicepresident del grop popular europèu a l’Eurocambra, rescontrèt dimars passat a Tallin lo primièr ministre d’Estònia, Juri Ratas; la presidenta, Kersti Kaljulaid, e lo president del Parlament Europèu, Antonio Tajani. González Pons, lor expliquèt los plans de la Generalitat de Catalonha de convocar un referendum d’autodeterminacion e los avertiguèt sus una eventuala proclamacion unilaterala d’independéncia.

En mai d’aquò, González Pons, exigiguèt dels representants del govèrn estonian “qu’[expliquèsson] la realitat que la [rescontrariá] Catatalonha” en remembrant que “s’un territòri quita unilateralament un estat al qual aperten, demòra automaticament fòra l’Union Europèa”. Dins aquel sens, González Pons afirmèt que “lo plan independentista de Puigdemont e sos sòcis es pas solament un atac contra la legalitat d’Espanha, mas tanben un atac e una provocacion contra tota l'UE, perque Espanha es una part substanciala d’Euròpa”.

Segon un comunicat del PP, “González Pons a explicat la situacion que viu Espanha davant la convocacion del referendum e la menaça d’una declaracion unilaterala d’independéncia”. A mai, lo pòrtavotz espanholista en Euròpa a demandat “fermetat a la presidéncia de l’UE que ven per afrontar aqueles faches, en cas que se produgan”. Segon lo deputat popular, la Generalitat es a “planificar un Brexit dins Espanha fòrça mai dur que lo Brexit britanic de l’UE”.